فروكێن توركیا كومه‌كا گه‌نجێن كۆمه‌لگه‌ها سیریێ كرنه ئارمانج
ئه‌ڤرۆ نیوز ، نه‌وزاد هلۆرى:
ئه‌ڤرۆ پشتى نیڤرۆ فروكێن توركیا كۆمه‌كا گه‌نجێن كومه‌لگه‌ها سیریێ یا سه‌ر ب ناحیا شێلادزێ كو ب مه‌ره‌ما كۆمكرنا گژ وگیای قه‌ستا ده‌ڤه‌را نێروه‌ورێكان كربوو ، كرنه ئارمانج و ئێك ژ وان برینداربوویه.
رۆژهات ئه‌حمه‌د، وه‌لاتیه‌كێ كۆمه‌لگه‌ها سیریێ بۆ ئه‌ڤرۆ نیوز گۆت” ئه‌ڤرۆ سپێدێ نێزیكێ پێنج گه‌نجێن كۆمه‌لگه‌ها سیریێ كو هه‌موو كه‌سوكارێن هه‌ڤدوبوون ب مه‌ره‌ما كۆمكرنا گژ و گیايێ بهارێ قه‌ستا ئاقارێ گوندێ هێل ل ده‌ڤه‌را نێروه‌ورێكان كر، به‌لێ پشتى نیڤرۆ بوونه ئارمانجا فروكێن توركیا و ئێك ژ وان برینداره و هه‌تا نها ناهێته زانین كا يێن دى بریندارن یان نه”.
زێده‌تر گۆت”تیمێن ڤێراگه‌هشتنا بله‌ز بریندار بۆ نه‌خوه‌شخانا ئامێدیێ ڤه‌گوهاستیه كو ناڤێ وى نیهاد محه‌مه‌ده و ژیێ وى 35 سالن و خه‌لكێ گوندێ ئه‌رتشته ل كۆمه‌لگه‌ها سیریێ”.
سالا بۆرى ژى ب هه‌مان شێوه فروكێن توركیا ب بهانه‌یا هه‌بوونا باره‌گایێن پارتا كرێكارێن كوردستانێ (په‌كه‌كه) حه‌فت وه‌لاتیێن سیریێ و شێلادزێ و دێره‌لوك شه‌هیدكرن.
