بلا مامۆستا نهبنه ئاڤكا چ حزبان!
سالار دۆسكى
مامۆستا ئانكو فهرمانبهرێن حوكمهتێ، ل ههموو جیهانێ مامۆستا دهێته نیاسین سومبلا ئاڤهدانكرنێ و رێزگرتنێ و پووتهدانێ، چونكو مامۆستا مرۆڤان بۆ ههر بیاڤهكێ ژیانێ ل ههر وهلاتهكى ئاڤا دكهت و ههر بیاڤهك ب دهستێ مامۆستا دهێته برێڤهبرن، مامۆستا دبیته دهرزینكا پێشكهفتن و گوهۆرینا ههر جڤاكهكى، لهوما د كهڤندا ل گوندان ب تایبهت، مامۆستا رێزهكا تایبهت ههبوو و ههر پێنگاڤهكا ل گوندى هاتبا هاڤێتن مامۆستایى بۆچوونا خوه ههبوو، بلا پتر نهچینه دیرۆكێ، یا ئاشكرایه كو دوهى ل پتریا باژێرێن كوردستانێ مامۆستا خرڤهبوون ئهنجامدان و داخوازا مافێن خوهكرن وهك مافهكێ شهرعى، چونكو رۆژانه دهێنه قوتابخانێ وانا دبێژن و دامهزراندیێن حوكمهتێ نه و مامۆستانه و نهشێن چ كارێن دى بكهن، ب تنێ حوكمهت بابێ وانه و گازندا خوه دگههینێ، تشتێ جهێ مخابنیێ ئالۆزى د ناڤبهرا مامۆستا و هێزێن ئێمناهیێ دا ل چهند دهڤهران دروست بوون، ئهڤێ چهندێ ژى پتر مامۆستا ئازراندن، لێ یا من دڤێت پتر ل سهر براوستم، گهلهك ژ پارتێن سیاسى خرڤهبوون و نهرازیبوونێن شهرعى یێن مامۆستا كرنه درووشم و رێبهرێن خوه و بانگهشه بۆ ههلبژارتنان و ب رێیا تۆرێن جڤاكى و سازیێن راگههاندنێ خوه كرنه نوونهرێن مامۆستا و گهلهك داخویانیێن توند دان كو ئهڤه نه رهوشتێ مامۆستا و نه رهوشتێ پهروهردێ، مامۆستا ب داخوازهكێ خرڤهبوونكربوون كو پاشكهفتا مووچهى نهمینت، ئهڤێن هاتینه ناڤ خرڤهبوونێ هندهك درووشمێن دى بلندكرن و مامۆستا كرنه ئافكهك و مفا بۆ خوه ژڤێ چهندێ وهرگرتن، ئهڤه ژى روویهكێ رهشێ و نهجوانێ مامۆستا نیشا د دهت، لهوما بێژم پێدڤى یه مامۆستا گهلهك ب هوشیارى داخوازا مافێن خوهیێن رهوا بكهن ژ حوكمهتێ و رێك ب چ ئالیێن سیاسى نه هێتهدان كو پتر درووشم و قهسێن كرێت و دوور ژ دابونهریتێن كوردهوارى ل سهر سازیێن راگههاندنێ بێژن، چونكو ئهڤه ههموو بۆ مامۆستا و فهرمانبهرێن ساخلهمیێ دهێته ههژمارتن، چونكو ئهڤا مه دوهى دیتى ب تنێ ههر دو كهرت بووینه و ههر دو تهخ ژى تهخێن رهوشهنبیرى و زانا نه، دیسا پێدڤى یه حوكمهتا ههرێما كوردستانێ ژى ههموو بزاڤان بكهت ژین و ژیارا مامۆستا و گشت فهرمانبهران خوهش بكهت و نه گههیته وى ئاستى مامۆستا داخوازا مافێن خوه بكهت ل سهر جادان و تۆرێن جڤاكى دا سڤكاتى ب مامۆستا بهێتهكرن، چونكو ئهڤ چهنده رامانا پاشكهفتن و بێ ئومێدیێ ل جهم خهلكى دیار دكهت.
