سوباهى رێژا پاشه‌كه‌فتا مووچێ هێزێن ئێمناهيێ دێ هێته دياركرن
ئه‌ڤرۆنيوز:
بريارده‌رێ لژنا ئاسايش وناڤخوه‌يى ل په‌رله‌مانێ كوردستانێ راگه‌هاند، هه‌تا رۆژا پێنجشه‌مبى 5/4/2018 وه‌زاره‌تا دارايى ل سه‌ر چ سيسته‌مه‌كێ نوو يێ پاشكه‌فتا مووچێ هێزێن ناڤخوه وئاسايشێ رێك نه‌كه‌فتبوو، دده‌مه‌كى دا رۆژانه 400 هه‌تا 500 په‌يوه‌نديێن ته‌له‌فونى ب مه دهێنه كرن ژئاليێ هێزێن ناڤخوه‌يێ وپێشمه‌رگه‌ى ڤه بۆ زانينا رێژا پاشكه‌فتكرنا مووچێ وان ل دووڤ سيسته‌مێ نوو.
قادر وه‌تمان، بريارده‌رێ لژنا ئاسايش وناڤخوه ل په‌رله‌مانێ كوردستانێ دداخۆيانيه‌كا رۆژنامه‌ڤانى دا گۆت” به‌رده‌وام ل گه‌ل به‌رپرسێن وه‌زاره‌تا دارايى وئابوورى دپه‌يوه‌نديێ داينه بۆ وێ چه‌ندێ دا بزانين كا رێژا پاشكه‌فتكرنێ چه‌نده وخشتێ نوو يێ چاوانه”.
گۆت ژى” ئه‌م پێشبينيێ دكه‌ين كو كورتهێنان هه‌بيت دوى كوژمێ دياركرى ژئاليێ حوكمه‌تێ ڤه كو 22 مليار دينارن بۆ هێزێن ئێمناهيێ”.
وه‌تمانى ئاشكراكر ژى” رێژا پاشكه‌فتا مووچێ هێزێن ئێمناهيێ نه‌هاتيه دياركرن، له‌وما ئه‌م به‌رده‌وام ددانوستاندنێ داينه وپێشبينيێ دكه‌ين سوباهى ئێكشه‌مبى ل گه‌ل وه‌زيرێ دارايى دانوستاندنێ بكه‌ين بۆ وێ چه‌ندێ خشتێ دووماهيێ يێ مووچێ هێزێن ئێمناهيێ بهێته به‌لاڤكرن وبهێته زانين كا چه‌نده”.
ل هه‌فتيا بۆرى ده‌ست ب به‌لاڤكرنا مووچان هاته كرن ب وى سيسته‌مێ نوو يێ پاشكه‌فتى ئه‌وێ حوكمه‌تا هه‌رێمێ ل رۆژا 28/3/2018 دياركرى كو زوورترين رێژا پاشكه‌فتى دێ 30% بيت”.
