رۆژنامه‌كا بريتانى:توركيا مه‌شقێ ب چه‌كدارێن داعشێ دكه‌ت
ئه‌ڤرۆنيوز:
رۆژناما ئيندپێندتى يا بريتانى ئاشكرا دكه‌ت، توركيا مه‌شقێ ب چه‌كدارێن داعشێ دكه‌ت ودئێخيته دناڤ رێزێن له‌شكرى سوورى يێ ئازاد دا تاكو ل عه‌فرينێ دژى كوردان بكاربينيت.
رۆژناما ناڤبرى، وه‌كو سايتێ شه‌فه‌ق نيوز، ئه‌و ده‌نگوباس ژێ ڤه‌گوهاستى، به‌لاڤكريه” پتريا ئه‌و چه‌كدارێن دژى يه‌په‌گێ شه‌رى دكه‌ن، سه‌ر ب رێكخراوا داعش يا تيرۆرستى ڤه‌نه”.
رۆژناما بريتانى دياركر ژى” توركيا بزاڤكر هه‌موو ئاليه‌كى دسه‌ردا ببه‌ت ل ده‌مێ ده‌ستپێكا ئۆپه‌راسيۆنا خوه يا له‌شكرى راگه‌هاندى كو دژايه‌تيا داعشێ دكه‌ت، به‌لێ يا راست ئه‌وه توركيا مه‌شقێ ب چه‌كدارێن داعشێ دكه‌ت ووان دهنێريته عه‌فرينێ”.
هه‌روه‌سا ئاماژێ بۆ وێ چه‌ندێ دكه‌ت كو ئه‌و سه‌ركردێن مه‌شقێ ب چه‌كدارێن به‌رێ يێن داعشێ دكه‌ن، رێ ناده‌ن ئه‌و زه‌لامێن داعشى شێوازێ ترومبێلێن بۆمبه‌رێژكرى وهێرشێن خوه‌كوژى ئه‌نجام بده‌ن، چونكى ئه‌ڤ چه‌نده دێ هه‌ماهه‌نگيێ دناڤبه‌را داعشێ وتوركيا دا ئاشكرا كه‌ت”.
ل دووڤ وێ رۆژنامێ” هه‌موو ئه‌و چه‌كدارێن داعشێ ئه‌وێن برينه دناڤ له‌شكرێ سووريێ ئازاد دا كو هژمارا وان 10 هزار چه‌كدارن، ل گه‌ل توركيا دئۆپه‌راسيۆنێ دا دپشكدارن”.
ل 18/3/2018 پشتى 58 رۆژان ژ ده‌ستپێكرنا ئۆپه‌راسيۆنا له‌شكرێ توركى دژى عه‌فرينێ، له‌شكرێ توركى وهێزێن توندره‌و يێ نهه‌ڤپه‌يمانێن وێ شيان عه‌فينێ داگير بكه‌ن ونێزيكى 160 هزار خه‌لكى وى باژێرێ ئاواره بوون.
