هنده‌ك په‌رله‌مانتارێن گۆڕان دژى كوتا نه‌ته‌وان ل په‌رله‌مانێ كوردستانێ شه‌ر راگه‌هاند
ئه‌ڤرۆ نيوز:
ژماره‌كا په‌رله‌مانتارێن سه‌ر ب بزاڤا گۆڕان راگه‌هاند كو د رێيا قانوونه‌كێ دا داخوازا راستڤه‌كرنا قانوونا هه‌لبژارتنێن هه‌رێما كوردستانێ دكه‌ن ب مه‌ره‌ما ژناڤبرنا كوتا پێكهاتێن نه‌ته‌وى.
ژماره‌كا په‌رله‌مانتارێن بزاڤا گۆڕان راگه‌هانديه، پێدڤيه كوتا پێكهاتان نه‌مينيت و ب تنێ پيڤه‌ر بۆ ئه‌ندام په‌رله‌مانبوونێ ل په‌رله‌مانێ كوردستانێ ب ده‌ستڤه‌ئينانا ده‌نگێن وه‌لاتيان بيت.
ل هه‌رێما كوردستانێ، ب گۆره‌ى قانوونا هه‌لبژارتنا ل په‌رله‌مانێ كوردستانێ 11 كورسيێن په‌رله‌مانى بۆ كوتا پێكهاتێن كلد و ئاشوورى و ئه‌رمه‌ن و توركمانان هاتينه ته‌رخانكرن.
كه‌مال يه‌لدا، نوونه‌رێ كرستيانان ل په‌رله‌مانێ كوردستانێ دژاتيا خوه بۆ وى هه‌لويستێ گۆڕان ده‌ربڕى و راگه‌هاند كو ده‌مه‌كه ئه‌و بزاڤا بۆ نه‌هێلانا كوتا پێكهاتان دده‌ن.
هه‌روه‌كو كرستيانان، توركمان ژى د نه‌رازى نه، وه‌كو ئه‌و ب خوه به‌حس لێ دكه‌ن، ژ به‌ر كو توركمان ل سه‌ر پرسێن نه‌ته‌وى د دوورن ژ بزاڤا گۆڕان، ژ به‌ر هندێ به‌رده‌وام ئه‌و دژاتيا توركمان و پێكهاتێن دى دكه‌ن.
د ڤێ ده‌ربارێ دا، شيره‌تكارێ سه‌رۆكاتيا په‌رله‌مانى ل سه‌ر پشكا بزاڤا گۆڕان كاردۆ محه‌مه‌د راگه‌هاند، گه‌له‌ك جاران په‌رله‌مانتاره‌ك داخۆيانيه‌كێ دده‌ت، دبيته ئه‌گه‌رێ دلمانا هنده‌ك لايه‌نێن سياسى، به‌لێ ئه‌و گۆتنێن فه‌رمى يێن بزاڤا گۆڕان نينن.
پشكه‌ك ژ حزبێن پێكهاتان ب وێ چه‌ندێ دهێنه تۆمه‌تبار كرن كو سيبه‌را حزبه‌كا دياركرى نه، به‌لێ ئه‌و وێ گۆتنێ ره‌ت دكه‌ن و دبێژن كو پێكهاته كار بۆ پێكڤه‌ژيانا ئاينى و نه‌ته‌وى دكه‌ن، بۆ پرسێن نه‌ته‌وى ژى هه‌لويستێ وان يا بنه‌جهه.