به‌رهه‌نگاریێن دكه‌ڤنه به‌رۆكا كاندیدێن كوردان
خالد ئه‌حمه‌د بادى
بۆ قووناغا داهاتى یێ حوكمرانیێ ل عیراقا فیدرال، زۆر كار ورژدى و دلسۆزى و ئێكرێزى و ئێك په‌یامى پێ دڤێت, چونكو غه‌ریزه‌یا پێكڤه‌كاركرنا كورد و عه‌ره‌بان ل عیراقێ عه‌قلیه‌تێن شاش و دكتاتۆر دروست كرین، ئه‌و غه‌ریزا مه به‌حس لێ كرى نه یا خودایى یه، به‌لكو یا كه‌سۆكى و هه‌رێمى بوو. چیرۆكا كورد و عه‌ره‌بان ل عیراقێ زۆر یا كه‌ڤنه و هه‌ر ل ده‌مێن ده‌سپێكى یێن چه‌رخ و سالێن بۆرى، ئه‌ڤ راستیه دیار بوویه ژ وان ژێده‌رێن دیرۆكى كو عیراق و عه‌ره‌ب پیچه‌كى د ژێكدوورن و به‌لكو ژێده‌رێن دیرۆكى پتر به‌حسێ كه‌ڤناتیا كوردستانیه‌تێ ل عیراقێ دا هه‌بوویه, نموونه زۆرن، یێ ژ هه‌میان بهێزتر دبێژن ناڤێ به‌غدا كوردى بوو و ژێده‌رێن دى دبێژن وه‌زیرێ مستعمراتا بریتانى نامه‌ك بۆ مه‌لكێ عیراقێ نڤێسیبوو د پرتووكا (أعوام الرماد) و گۆتیێ (راسته مه سۆزا ده‌وله‌ته‌كا عه‌ره‌بى دایه هه‌وه نه ئیمپراتۆریه‌ت ئه‌ڤا ل پشتى چیایێ حه‌مرینى ئه‌و كوردستانه)، رۆژ بۆرین و یا ئینایه سه‌رێ كوردان ب ده‌هان پرتووك و فلم و سیناریۆ و تێرا بایت خلاس ناكه‌ن. قووناغێن بۆرى یێن ده‌ستهه‌لاتى ل عیراقا فیدرال بۆرین و پشتى سه‌رهلدانا پیرۆز و شه‌ڕێ ئازادیا عیراقێ، قووناغێن نووتر و گونجایتر بۆ كوردان هاتینه, هه‌ر چه‌ندى كا چاوا باوه‌رى ب كوره‌مارى ناهێت وه‌سا باوه‌ریا كوردان ژی ب وان عه‌قلیه‌تا یێن ده‌ستهه‌لات ل عیراقێ كرى ناهێت، چونكو یه‌ك به‌رنامه و بیروبۆچوون وانان به‌رامبه‌ر كوردان هه‌یه، لێ سیاسه‌تا وه‌لاتێن زلهێز و جوگرافى و كه‌توارێ ده‌ڤه‌را رۆژهه‌لاتا ناڤه‌راست ئه‌ڤ ره‌وش و به‌روبیاڤه بۆ دروست كریه و ملله‌تێ كورد نه‌چاركریه كو مامه‌لێ ل گه‌ل وان بكه‌ین. دیار بوو خولێن به‌ریكێ چ ره‌وش بۆ كوردان په‌یداكر، نوكه فه‌ره ب هه‌ستیارى و هشیارى به‌ر ب به‌غدا بكه‌ڤینه رێ و جڤاته‌كێ یان به‌ره‌یه‌كێ ب هێز دروست بكه‌ین و رێنمایى ل جه‌م وى به‌ره‌یى یان سه‌ركردایه‌تیێ بۆ كاندێن كورد بچن و دیراسا ره‌وشا سیاسى و ئابوورى یا ده‌ڤه‌رێ ب هوورى بهێته‌كرن و بریار ژ جڤاتێ بده‌ركه‌ڤن و كاندیدێن مه وان بریار و خالان ل گه‌ل عیراقا فیدرال به‌حس بكه‌ن ئانكو مه كوردان پێدڤى ب مه‌رجه‌عیه‌ته‌كێ یه كو ب تنێ به‌رژه‌وه‌ندیا ملله‌تێ كورد بپارێزن، ئانكو هه‌مى بریار و رێنمایى و خال ب به‌رنامه بیت و ب تنێ وه‌كو كورد ل به‌غدا كار بكه‌ن نه وه‌كو لایه‌ن و پارت. كاندیدێن مه ل په‌رله‌مانێ عیراقا فیدرال زۆر دكێمن و نه‌شێن چ بریاران بده‌ن، چونكو كێمینه و زۆرینه یا ل سه‌ر هه‌مى ناڤه‌ندێن بریارێ ل عیراقێ زاله ئه‌ڤ عه‌قلیه‌تا عیراقیان ژی هه‌ر ئه‌و عه‌قلیه‌ته یا كو تۆز و گویرهه كه‌فتیه سه‌ر ئه‌ڤا دمینیت ئه‌وه كو ئێكرێزیه‌ك په‌یدا ببیت و سه‌حكه‌ته ده‌نگان و لیستان نه‌كه‌ن بتنێ سه‌یرى كوردایه‌تى و كوردستانێ بكه‌ن. په‌یاما من بۆ هه‌مى كاندیدان ئه‌و باوه‌ریا لایه‌نێ ته و جه‌ماوه‌رێ دایه هه‌وه، ل پێش چاڤ بیت و ب دلسۆزى و خه‌مخۆرى و كوردینى كار بكه‌ن و ناڤێ كوردستانا پیرۆز سپى بكه‌ن و ده‌ستان ژ پۆست و پله و به‌رژه‌وه‌ندیان به‌رده‌ن و ب تنێ پله و پۆست ئه‌وه یا جه‌ماوه‌رێ ته بته‌ڤه مینیت گرێداى چونكو باوه‌رى دایه ته. چونكو ئه‌و جهێ هوون دێ چنێ به‌ره‌یه‌كێ سه‌خته و شه‌ڕ پێ دڤێت و دڤێت هوون دچه‌كدار بن ب چه‌كێ دلسۆزى و زانینێ، دا بشێن به‌رهنگاریا وان هۆڤان بكه‌ن.
