ب به‌لگه: ئه‌مريكا سێ گرۆپێن حه‌شدا شه‌عبى وه‌كو تيرۆست دده‌ته نياسين
ئه‌ڤرۆ نيوز:
كونگرێسێ ئه‌مريكا د پرۆژه بڕياره‌كێ دا، عه‌سائب ئه‌هلولحه‌ق ب رێبه‌راتيا خه‌زعه‌لى و بزاڤا نوجه‌ب ب سه‌رۆكاتيا ئه‌كره‌م كه‌عبى و حزبولا يا عيراقى وه‌كو رێكخراوا تيرۆرستى دده‌ته نياسين و پرۆژه ره‌وانه‌ى جڤاتا پيران دكه‌ت بۆ وێ چه‌ندێ ده‌نگى ل سه‌ر بده‌ت.
ب گوره‌ى به‌لگه‌يه‌كا كۆنگرێسى ئه‌مريكى كو د ميديايان دا به‌لاڤكريه، هه‌ر ئێك ژ عه‌سائيب ئه‌هلولحه‌ت و بزاڤا نوجه‌ب و حزبولا يا عيراقى وه‌كو تيرۆرست هاتينه پۆلينكرن.
ئه‌و گرۆپێن چه‌كدارێن شيعى ب وێ چه‌ندێ دهێنه تۆمه‌تباركرن كو ئێكسه‌ر ژ لايێ كۆمارا ئيسلامى يا ئيرانى ڤه دهێنه پشته‌ڤانيكرن و د ماوێ بۆرى ژى دا، چه‌ندين جاران گه‌ف ل هێزێن ئه‌مريكا ل عيراقێ و ده‌ڤه‌رێ كرينه دا كو خوه ڤه‌كێشن و هه‌كه ڤه‌نه‌كێشن هێرشێ بكه‌نه سه‌ر.
د ماوێ چه‌ند هه‌يڤێن بۆرى ژى سه‌ركردێن وان گرۆپێن شيعه ل لوبنان و ل نێزيك سنورێن ئسرائيل ده‌ركه‌فتن و وه‌كو گه‌ف بۆ سه‌ر ئسرائيلێ هاته لێكدان.
ئه‌ڤه د ده‌مه‌كى دايه كو ڤان هه‌رسێ گرۆپێن چه‌كدارێن شيعه، د ناڤ هێزێن حه‌شه‌د شه‌عبى دا رۆله‌كێ كاريگه‌ر هه‌بوويه و ده‌مێ هێرش كريه سه‌ر باژێرێ كه‌ركووكێ و ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ ژى ب چه‌ند چه‌ك و تانكێن ئه‌مريكى ده‌ركه‌فتن و ره‌خنه‌كا زۆر ل واشنتۆن هاته گرتن كو چه‌كێن وان كه‌فتينه ده‌ست ميليشايێن شيعى يێن سه‌ر ب ئيرانێ ڤه.
