سەرۆکێ لیژنا بەرگریێ و ئاسایشێ ل پەرلەمانێ عێراقێ : كوردان دوو مه‌رج بۆ پشكداریكرنێ د حوکمه‌تا نوو یا عێراقێ دا هه‌نه
ئەڤرۆ نیوز ، زنار تۆڤی :
سه‌رۆكێ لیژنا به‌رگری و ئاسایشێ ل په‌رله‌مانێ عێراقێ مه‌رجێن لایەنێن كوردستانی بۆ پشكداریكرنێ د حوکمه‌تا نوو یا عێراقێ دا ئاشكراكرن و راگه‌هاندیه ،کو كوردان دوو مه‌رجێن سه‌ره‌كی هه‌نه بۆ پێکئینانا حوکمەتا نوو ، لێ مه‌حاله ئەو مەرج بهێنه بجهئینان.
حاكم زاملی سه‌رۆكێ لیژنا به‌رگری و ئاسایشێ ل پەرلەمانێ عێراقێ بۆ میدیایێن عێراقی گۆتیه ژی : شاندێن جۆدا یێن لایەنێن سه‌ركه‌فتی یێن هه‌رێما كوردستانێ سه‌ره‌دانا به‌غدا كریه و ب تایبه‌ت شاندا پارتی و ئێكه‌تیێ كو د كۆمبوونێن وان یێن ل گه‌ل هه‌موو لایەنێن عێراقی دا وه‌سا دیاربوویه ، كو كوردان دوو مه‌رجێن سه‌ره‌كی هه‌نه ، ئه‌و ژی ئاسایكرنا ده‌ڤه‌رێن كێشه ل سه‌ر و مه‌رجێ دویێ ژی، بجهئینانا دستووری و دابینكرنا پشكا 17% ژ بوودجا گشتی یا بۆ هه‌رێما کوردستانێ.
ناڤهاتی گۆت ژی ، ئه‌ڤ هەردو مه‌رجه گه‌له‌ك ب زه‌حمه‌تن و مه‌حاله بهێنه بجهئینان و هه‌ر سه‌رۆك وه‌زیره‌كێ سۆزا بجهئینانێ بده‌تە کوردان ، دێ به‌رپرسیاریەكا مه‌زن كه‌ڤیته ستوویێ وی.