سائيرون: دبيت ژنه‌كێ بۆ پۆستێ سه‌رۆكاتيا وه‌زيران به‌ربژار بكه‌ين
ئه‌ڤرۆنيوز:
سه‌ركرده‌كێ هه‌ڤپه‌يمانيا سائيرون كو ره‌وتێ سه‌درى پشته‌ڤانيێ لێ دكه‌ت راگه‌هاند، سائيرون ونه‌سر حيكمه ولايه‌نێن كوردى دنێزيكن بۆ گرێدانا هه‌ڤپه‌يمانيه‌كێ ودبێژيت دبيت ژنه‌كێ بۆ پۆستێ سه‌رۆكاتيا وه‌زيران به‌ربژار بكه‌ين.
جاسم حه‌لفى سه‌ركردێ ره‌وتێ سه‌درى وهه‌ڤپه‌يمانيا سائيرون دداخۆيانيه‌كا رۆژنامه‌ڤانى دا گۆت” نابيت پۆست ل سه‌ر بنه‌مايێ پشك پشكانێ بهێنه به‌لاڤكرن، ب شێوه‌كى سه‌رۆك وه‌زيران تنێ بۆ شيعان بيت وسه‌رۆكاتيا په‌رله‌مانى بۆ سونه‌يان وپۆستێ سه‌رۆكاتيا كۆمارێ ب كوردان.
دياركر ژى، هه‌كه بابه‌ت ب وى شێوه‌ى بيت، ئه‌م دێ هنده‌ك كه‌سان دانينه وان پۆستان كو دتايفگه‌رى نه‌بن.
ل دۆر پۆستێ سه‌رۆك وه‌زيران، گۆت” ب ئێك به‌ربژار ب تنێ پێگير نابين، مه هێلا سور ژى نينه، دبيت پۆستێ سه‌رۆكاتيا وه‌زيران ب ژنه‌كێ بهێته دان”.
دياركر ژى” ئه‌م ژ ليستێن نه‌سر وحيكمه ولايه‌نێن گرنك يێن كوردستانێ دنێزيكين”.