بۆ جارا ئێکێ ل عیراقێ ئامیرەکێ نوو بۆ نشتەرگەریان ل دھۆکێ دھێتە بکارئینان
ئه‌ڤرۆنيوز:
نۆشدارەکێ تایبەتمەندێ تێشک و سۆنارێ ل دھۆکێ دیار کر کو رێڤەبەریا گشتی یا ساخلەمیا پاريزگه‌ها دھۆکێ ئامیری ( ئار ئیف) بۆ ئەنجامدانا ھندەک جۆرێن نشتەگەریان ب تایبەتی یێن ھەستیان دابینکریە، نوکە سێ نەخوه‌ش یێن پێ ھاتینە چارەسەرکرن ئەو ژی گرێکەکا گەلەک نەخوه‌ش دناڤ ھەستی یێن وان دا بوو ئەو گرێک بۆ ئەگەر كو ئێشانەکا مەزن بۆ نەخوه‌شی دروست ببیت.
سوھەیب حەسەن، نوشدارێ تایبەتمەندێ تێشک و سۆناری ل نەخوه‌شخانا ئازادی یا فێرکرنێ ل دھۆکێ بۆ نوش نيوز دیار کر کو بەری نوکە ھەر چەند دەمژمێران جارەکێ نەخوه‌شی حەبکێن تەناکەر دخوارن، لێ پشتی ئەڤ ئامیری نوو بۆ نەخوه‌شخانا ئازادی ھاتیە دابینکرن، ئەو شیاینە بێخنە دکاری دا و خزمەتا نەخوه‌شان پێ بکەن و گۆت: “جارا ئێکێ یە ل سەرانسەری عیراقێ و ھەرێما کوردستانێ ئامیرێ (ئار ئیف) بۆ نشتەگەریان ل دھۆکێ دھێتە بکارئینان، ھەکە ل وەلاتێ تورکیا ئەڤ چارەسەریە بھێتەکرن ژ پێنج ھزار دۆلاران دبۆریت، لێ ل پارێزگەھا دھۆکێ چو پارەک ناھێتە وەرگرتن، ئەم ڤان نەخوه‌شان دەست نیشان ناکەین، بەلکو نۆشدارێن تایبەتمەند دەست نیشان دکەن دەمێ دبینن گرێکەکا د ھەستیێ نەخوه‌شی دا و نەخوه‌ش پێ گەلەک دئێشيت ئەو دێ بۆمە فرێکەن، لێ یا گرنگ ئەو نەخوه‌ش بەری بھێتە نشتەگەریکرن، پێدڤیە وەکو ھەر نشتەگەریەکا دی نێزیکی شەش دەمژمێران خوارنێ نەخۆت و ئاڤی ژی بەری نشتەگەریێ ب چار دەمژمێران ڤەنەخۆت”.
ناڤھاتی ئاشکرا کر کو گەلەک نەخوه‌ش بێ ھۆشکەریا گشتی وەردگرن ژ بەر کو گرێکەکا گەلەک ب ئێشە و ئەو وێ ئێشانێ ھەموو یێ بەرددەن و دچیتە د ناڤ خۆینی دا وی دەمی دا پێدڤیە نەخوه‌ش ژی یێ بێھوشکری بیت و گۆت: “بەری نوکە چارەسەریا وان گەلەک یا ب زەحمەت بوو، چونکی ب ملیمانە و رەنگە چار ھەتا پێنج ملیما بن د ناڤ ھەستیکەکی دا ھەموو خۆین و پارچێن ھەستیکی دھێنە راکرن، لێ نوکە ئامیرێ ئار ئیف ل سەرانسەری جیھانێ ب رێژا 95% یێ سەرکەفتی یە ودەمێ چارەسەری ب ریێا ڤێ ئامیرێ نوو دھێـتە کرن ئەو گرێک بنبر دبیت و نامینيت”.
نوشدار سوھەیب حەسەن ل گەلەک وەلاتان مەشق و راھێنان ل سەر ڤی ئامیرەی کریە وەکو وەلاتێ دانیمارک و پاکستان و تورکیا بۆ دەمێ سێ ھەیڤان ل ھندێ ژی ل سەر ھەمان ئامیرە کارکریە، نوکە ل دھۆکێ ئەڤ ئامیرە کەفتیە د خزمەتا نەخوه‌شان دا.