نڤیسهر و قهیرانا چاپكرنێ
هزرهك
نڤیسهر و قهیرانا چاپكرنێ
د. رهشید فندی
بێگومانه نڤیسهر كهسهكێ بههرهمهنده لناڤ جڤاكێ خۆ و خودانێ هندهك هزرێت باشه، كو پێدڤیه كۆمهل مفای ژێ وهرگریت، چنكی ئهو كهسێ بههرهمهند دهمهكێ زۆر ب وی كارێ بههرهمهندی ڤه د بۆرینیت دا هندهك هزرێت نوی بگههینیت.
د جڤاكێت پێشكهفتیدا، خهلك چاڤه رێ دكهت، كا ئهو بههرهمهند دێ چ بهرههمێ نوی ئینته بازاری، جا ڤێجا ئهو بهرههم رۆمان یان چیرۆك بیت، یان هۆزان بیت، یان ڤهكۆلین بیت یان ڤهكۆلینهكا زانستی و داهینان بیت، ههر چهوا بیت ئهو ڤهرێژا هزری یه و مفاداره بۆ جڤاكی.
ههر وهسا دهزگههێت بهلاڤ كرنێ، پهیوهندیێ پێ دكهن دا چاپكرنا وی بهرههمی بۆ وان بیت و پشتی چاپكرنێ ئهو مفا بگههیته وان. كهسێ نڤیسهر نهمازه نڤیسهرێت باش بخۆ ب داهاتێ وی بهرههمی دژین، كو ب هزاران دانه ژ وێ پهرتووكێ تێنه چاپكرن و بهلاڤكرن.
مه ل ڤێره نهڤێت و ئهم نهشێین خۆ دگهل وان جڤاكێت پێشكهفتی بهرامبهر كهین، چنكی چو بنهمایێت مه وهكی ئێك نینن.
لێ ئهم دشێین ل دویف رهوشا خۆ پێت خۆ هندی بهركا خۆ درێژ بكهین، بۆ نموونه ههمی نڤیسهران ل كوردستانێ ئارێشا چاپكرنێ یا ههی، ل پهی هزرا مه د ڤێت لایێت پهیوهندیدار ژ ڤی بابهتی هندهك رێیێت ساناهیتر بگرنه بهر بۆ چاپكرنا بهرههمێت نڤیسهران، جا چ وهزارهتا رهوشهنبیری بیت یان زانكۆ بن یان ئێكهتیا نڤیسهران بیت یان لایێت ئههلی و خومالی.
ژ لایهكێ دی ڤه، دڤێت ئهم خۆ خشیم و گێل و دهبهنگ نهكهین و دڤێت رهوشا خواندنا پهرتووكێ ل كوردستانێ باش بزانین، كو خرابترین رهوشه و پهرتووك نوكه نا ئێنه خواندن، جا چ ژ ئهگهرا بهلاڤبوونا ئامیرێت تهكنیكی بیت وهكی كۆمپیوتهر و فێسبۆك و تویتهرا بیت .. هتد.
یان ژی ژ بۆ بێ زهوقی و بێ گێولی بیت، نهمازه لجهم تهخا نوی ژ جڤاكێ مه، چنكی ههر تشتێ وی بڤێت بێ خواندن یێ بدهست دكهڤیت.
لێ ههر چهوا بیت خواندنا پهرتۆكێ دێ مینیت ئێك ژ ببهاترین نرخێت هزری یێت مرۆڤی و باشترین ژێدهر بۆ گههاندنا زانیاریا بۆ مهژیێ مرۆڤی.
رهوشا كتێبخانا ژی رهوشهكا شر و بێ سهروبهره، ئانهكۆ كێم كتێب تێنه كرین و هندهك ژ خودانێت كتێبخانا خهریكن كتێبخانێت خۆ بفرۆشن یان قهپات كهن, چنكی فرۆتنا وان بۆ كتێبا كرێیا دكانێت وان ژێ چێنابیت، ههر وهسا پهرتووكخانێت گشتی وهكی پهرتووكخانا بهدرخانیان بۆ نموونه، كێم كهس سهرهدانا وان دكهن و خوهندهڤایێت وان گهلهك دكێمن.
ئهڤ ئارێشه نه ههر ل بهرۆكا كتێبخانایه، بهلكۆ پتر ل بهرۆكا نڤیسهرانه ژی، واته پهرتووكێت وان نا ئبَنه فرۆتن، هندهك نڤیسهران یا گۆتیه من، دهمێ ئهو جار جارا سهرهدانا پهرتووكخانا د كهن دا بزانن، كا پهرتووكێت وان هاتینه فرۆتن یان نه، دێ هندهك جارا بینن، پهرتووكێت وان خوێركێ یێت خوارین یان شههێ یا لێدای و یێت بێ سهروبهر بووین.
دهمێ من پسیارا خودانێت پهرتووكخانا كری، وان ژی ئهگهرا خۆ ههبوو، كو دڤێت رۆژانه وان پهرتووكا راكهن و دانن و وان جهێ بهرفرهه نینه بۆ ڤێ هژمارا زۆرا پهرتووكا.
من وهك ئێك ژ نڤیسهرا ئهڤ ئارێشه یا بخۆ چارهسهر كری، ئهو ژی ئهوه ئهز پهرتووكێت خۆ ب هژمارهكا كێم د دانمه پهرتووكخانا و ههر دهمێ ئهو هژمارا كێم نهما، ئهز هندهكێت دی بۆ دبهم. ئهگهر ئهو هژمارا كێم ژی نههاته فرۆتن، ههر دیسان نابیته ئارێشه بۆ خودانێ پهرتووكخانێ، چنكی هژمارا كێم بۆ وی ژی نابیته ئارێشه.
تشتێ من ل داویێ د ڤێت بێژم، رهوشا مه یا ڤهرێژا هزری گهلهك یا خرابه و پێدڤیه ب رژدی ئهم لسهر راوهستین.
