ھەتا پێکئینانا حوکمەتا عێراقێ ئێکلا نەبیت پاشەڕۆژا ئابوورێ ھەرێمێ دیارنابیت
ئه‌ڤرۆ نيوز:
ئەڤسالە ھەتا نوکە چو پیشەنگەھێن نێڤدەولەتی لھەرێما کوردستانێ نەھاتینە ڤەکرن و سەرپەرشتیارێن پیشەنگەھێن نێڤدەولەتی ژی دیارکر، قەیرانا ئابوری و تێکچوونا پەیوەندیێن ھەرێم و بەغدا کاریگەری لسەر ڤەکرنا پیشەنگەھان ھەبویە و دبێژیت، ھەتا حوکمەتا نویا عێراقێ نەھاتینە پێکئینان چو رۆناھی لبەر مەنینە بۆ گەشەکرنا رەوشا ئابوری.
عەبدولا ئەحمەد،سەرپەرشتیارێ پیشەنگەھێن نێڤدەولەتی بۆ رۆژناما ئەڤرۆ گۆت” ئەڤسالە ھەتا نوکە ھێشتا چو پیشەنگەھێن نێڤدەولەتی ل ھەرێما کوردستانێ نەھاتینە ڤەکرن، ئەڤە ددەمەکی دایە بەری ھاتنا قەیرانا ئابوری سالانە چەندین پیشەنگەھێن نێڤدەولەتیێن جودا لھەرێما کوردستانێ دھاتنە ڤەکرن و لسەر تاسەری جیھانێ کۆمپانیێن بیانی پشکداری تێدا دکر، بەلێ مخابن دگەل ھاتنا قەیرانا ئابوری و شەڕێ داعش ڤەکرنا پیشەنگەھێن نێڤدەولەتی ھاتیە راگرتن و تنێ ئەڤسالە ھەتا نوکە ئێک پیشەنگەھژی نەھاتیە ڤەکرن، بەلێ بڕیارە ھەیڤا ئەیلوولا داھاتی پیشەنگەھەکا نێڤدەولەتی بۆ کۆمپانی و بەرھەمێ وەلاتێ مسرێ بھێتە ڤەکرن، بەلێ ھەگەر ئاستەنگ نەھێنە چێکرن و رەوش رێکێ بدەت بۆ ڤەکرنا پیشەنگەھێ.
عەبدولا ئەحمەد گۆتژی” ھەر کۆمپانیەکا بھێتە ھەرێما کوردستانێ دوڤ کاری دگەڕیت، چونکە ئەگەر کۆمپانیەک یان کارگەھەیەک رۆناھیەکێ پێش خوە نەبینیت دێ چاوا کار کەت، ناھێتە ڤەشارتن ئابورا ھەرێما کوردستانێ ب ئەگەرێن قەیرانا ئابوری و تێکچوونا پەیوەندیێن ناڤبەرا ھەرێم و بەغدا زۆر داکەتیە و پێدڤی ب گەشەکرنێ ھەیە ھەتا کۆمپانیێن بیانی بھێنە ھەرێما کوردستانێ، چونکە ئاستەنگێن ئابوری گەھشتە رادەیەکی حوکمەت نەشیا مووچێ فەرمانبەران بەلاف کەت، ڤێجا خویایە کۆمپانیێن بیانی دخوازن سەرمایێ خوە ل جھەکی بمەزێخن مفایێ خوە ببینن، ئەنجامدانا وەبەرھێنانێ لسەر بنەمایێ ئابوریا بھێزە دەمێ مە ئابورەکا بھێز نەبیت دێ چاوا کۆمپانیا وەبەرھێنانێ لکوردستانێ ئەنجامبدەن، ھەموو تشتەک یێ رۆھنیە لبەر چاڤێن مە نوکە ئەم چاڤەڕێی پێک ئینانا حوکمەتا نویا عێراقێ دکەین دابزانین دێ چەند ڤەکێشیت و چاوا ھێتە پێکئینان، چونکە ھەلبژارتنێن پەرلەمانێ کوردستانێ ژی لبەر مەنە رەوش ژلایێ سیاسی ڤە یا جێھگیر نینە.