پتريا پرۆژێن مریشكان ل ده‌ڤه‌را بارزان هاتینه راگرتن
ئه‌ڤرۆ نیوز ، نه‌وزاد هلۆرى:
ژبه‌ر ئه‌رزانبوونا بهایێ مریشكان و نه‌بوونا بازارى بۆ فرۆتنا به‌رهه‌مێن وان ل هه‌رێما كوردستانێ و وه‌رگرتنا گۆمركێ ژلایێ عیراقێ و هاتنا مریشكا بیانى كارتێكرن ل سه‌ر به‌رده‌وامبوونا ب خودانكرنا مریشكان ل ده‌ڤه‌را بارزان كریه و ئه‌ڤ یه‌ك بوویه ئه‌گه‌ر كو پتريا وان بهێنه راگرتن.
هاشم موسته‌فا، خودانێ پرۆژه‌یه‌كێ مریشكایه ل ده‌ڤه‌را بارزان بۆ ئه‌ڤرۆ نیوز گۆت: (ئه‌ڤه سێ ساله من پرۆژه‌یه‌كێ مه‌زن یێ مریشكان كو پێكدهێت ژ سێ ده‌واجنان ل ده‌ڤه‌را بارزان دانایه، به‌لێ ل شوونا كو ئه‌ز زێده‌تر گرنگیێ ب كارێ خوه بده‌م و به‌رفره‌هتر بكه‌م، نها ده‌ست به‌ردارێ كارێ خوه بووم و ئه‌گه‌را وێ ژى دزڤریت بو وێ یه‌كێ كو بهایێ مریشكێ يێ ئه‌رزانه و عیراق ژى ل خالێن خوه گۆمركێ وه‌ردگریت و بازار ژى ل ناڤخوه نینه و دیسان مریشكا بیانى ژى دهێته هه‌رێما كوردستانێ كو كارتێكرن ل مریشكا مه كریه و بازار زۆر كێمه ژبه‌رڤێ ئه‌م نه‌شێن ب خودان بكه‌ین)
ئیبراهیم سه‌دیق، ئه‌و ژى وه‌لاتیه‌كێ ده‌ڤه‌رێ یه و پرۆژێ خوه راگرتیه بۆ ئه‌ڤرۆ نیوز گۆت: (ئه‌ڤه سێ جاران ل سه‌ر ئێك ژبه‌ر نه هه‌ڤسه‌نگیا بهایێ مریشكان ئه‌ز تووشى خوساره‌تیێ بووم و هه‌ر جارێكى 10 هزار هه‌تا 20 هزار دۆلاران و كارتێكرنێن زۆر ل سه‌ر مه كرینه كو ئه‌م نه‌شێن به‌رده‌وام بین ل سه‌ر كارێن خوه).
ناڤبرى دیاركر ژى كو پێدڤى یه حوكمه‌ت و لایه‌نێن په‌یوه‌ندیدار ب رژدى كار بكه‌ن بۆ باشتركرنا ره‌وشا خودانێن پرۆژان ل ده‌ڤه‌رێ و گۆت: (نێزیكێ 10 پرۆژێن مریشكان ل ده‌ڤه‌را بارزان يێن هه‌ين و پتريا وان نها هاتینه راگرتن ، به‌لێ هه‌كه حوكمه‌ت و لایه‌نێن شوله‌ژێ كار بكه‌ن بۆ په‌یداكرنا بازاره‌كێ بۆ فرۆتنا مریشكان و رێگریێ ل مریشكا هاورده د ده‌ما پێگه‌هشتنا مریشكا خومالى دا بكه‌ن و دیسان ل گه‌ل حوكمه‌تا ناڤه‌ندى یا عیراقێ بگه‌هن رێككه‌فتنه‌كێ كو گۆمركێ ژخودان پرۆژه‌یان وه‌رنه‌گرن، ل وى ده‌مى ئه‌ز باوه‌رم هه‌موو خودان پرۆژه دێ زڤرن سه‌ر كارێن خوه، و نها پرانیا ده‌واجنێن ده‌ڤه‌رێ هاتینه راگرتن و چه‌ندین خودان پرۆژه و كرێكار و خێزان ماینه بێ كار).
محه‌مه‌د عه‌بدوللا، رێڤه‌به‌رێ چاندنا قه‌زا مێرگه‌سوور بۆ ئه‌ڤرۆ نیوز گۆت: (ژئه‌گه‌را هاتنا مرشكا بیانى و جێگیرنه‌بوونا بازارێ ناڤخوه و په‌یدابوونا هنده‌ك نه‌خوه‌شيان و پشته‌ڤانى نه‌كرنا جوتیاران بوویه ئه‌گه‌ر كو كارتێكرن ل خودانكرنا مریشكان ل ده‌ڤه‌رێ بهێته‌كرن و هنده‌ك پرۆژه بهێنه راگرتن).
زێده‌تر گۆت: (چه‌ندین جاران مه جهێن شوله‌ژێ ل سه‌ر ڤێ یه‌كێ ئاگه‌هداركرینه، به‌لێ دیاره كو ره‌وشا دارایى یا هه‌رێما كوردستانێ یا گونجاى نه‌بوویه وه‌كو پێدڤى هاریكارى بۆ جوتیاران بهێنه‌كرن كو ل سه‌ر كارێن خوه به‌رده‌وام بن ، به‌لێ ب هه‌ر ره‌نگێ بیت پێدڤیه بازاره‌ك بۆ فرۆتنا مریشكا ده‌ڤه‌رێ بهێته په‌یداكرن داكو جوتیار بشێن ل سه‌ر كارێن خوه به‌رده‌وام بن).
