ئامادەکاریێن تایبەت بۆ کونترولکرنا تایا خوینبەربوونێ ل دھۆکێ دھێنە کرن
ئه‌ڤرۆ نیوز:
پشتی پەیدابوونا حالەتەکێ خوینبەربوونێ ل پارێزگەھا ھەولێرێ، رێڤەبەریا گشتی یا ساخلەمیا پارێزگەھا دھۆکێ ئامادەکاریێن خوە یێن خوپارستن و کونترولکرنا ڤێ نەخوشیێ وەرگرتینە و ئێکەمین کومبوون ل گەل رێڤەبەریا ڤیتەنەری ھاتە ئەنجامدان.
د. سیروان محەمەد ئەسوەد، رێڤەبەرێ کارۆبارێن خۆپاراستنا ساخلەمیێ بو نۆش نیوز دیارکر نەخوشیا تایا خوینبەربوونێ یا ھەڤپشکە دناڤبەرا ئاژەلی و مرۆڤی دا، لەورا پێدڤیە پلانەکا ھەڤیشک بھێتە دارێتن و گۆت: ئەم ل سەر چەند خالان رێککەفتین ژوانژی دووڤچوونا رەوشا ئاژەلی ب رژدی و ئەو جھێن پێدڤی ب رەشاندنێ دبن ب ھاریکاریا پارێزگەھا دھۆکێ بھێنە رەشاندن داکو ئەگەرێن نەخوشیێ کونترۆل بکەین.
رێڤەبەرێ خوپاراستنا ساخلەمیێ ل دھۆکێ دیارکر ژی ساخلەمیێ ل سەر دو تەوەران ئامادەکاری کرینە، تەوەرێ ئێکێ دێ ب رێیا ھشیاریا وەلاتیان بیت ل سەر مەترسی و رێکێن ڤەگوھاستنا نەخوشیێ و رێکێن خوپاراستنێ بو وەلاتیان دێ ھێنە دیارکرن، رێیا دوێ ژی ل نەخوشخانێن پارێزگەھا دھۆکێ ژورێن تایبەت بو کونترولکرنا نەخۆشیێ یێن ھاتینە ئامادەکرن و گۆت: ھەر نەخوشەکێ گومان لێ ھەبیت ھەموو پێرابوونێن خوپاراستنێ دێ ھێنە وەرگرتن و نموونێن خوینێ دێ ژێ ھێنە وەرگرتن و پشکنینکرن.
دیارکر ژی نەخوشی ب خوارنا گوشتی ناھێتە ڤەگوھاستن بەلێ ئەو کەسێ سەرەدەریێ ل گەل گوشتێ ئاژەلی دکەت پێدڤیە خوە ب پارێزیت ب رێیا ل بەرخوکرنا دەستگورکان و کەسێن بڕین ددەستان دا ھەبن باشترە سەرەدەریەکا راستەوخو ل گەل گوشتی نەکەن و گۆتژی:نەخوشی دبیتە ئەگەرێ مرنا 40% توشبوویێن وێ لەورا دڤێت خوپاراستن بەری چارەسەریێ بیت، ھەر حالەتەکێ گومان ل سەر ھەبیت مە پێدڤی ل بەر دەست ھەنە کو بشێین کونترول بکەین.