ڤيديۆ: كه‌سه‌كى ئاميره‌كێ نوو بۆ شووشتنا مه‌حفيران دروستكر
ئەڤرۆ نیوز، نەوزاد ھلۆری
وەلاتیەکێ شێلادزێ ، کارێ میکانیکی و کارەبایی دکەت رابویە ب چێکرنا نووترین داھێنان کو ئەو ژی چێکرنا ئامیرەکێ تایبەتە بو شوشتنا مەحفیران ب ساناھی ترین شێوە و کێمترین دەم.
رەشید ھێتوتی خودانێ ئەوێ داھێنانێ بو ئەڤرۆ نیوز گۆت: (پشتی دەمەکێ زور من شیا د چێکرنا داھێنانا خوە دا سەرکەفتی بم ئەو ژی ب چێکرنا ئامیرەکێ نوو کە مە ناڤێ وێ کریە ئامیرێ شوشتنا مەحفیران ، ئەڤ داھێنانە من یا چێکری و ل چوو جھێ، دنیایێ و کوردستانێ ژی نینە و ب رێیا ئەڤێ داھێنانێ مرۆڤ دشێت ب کێمترین دەم و ساناھی ترین شێوە مەحفیرێن مال بشووت).
زێدەتر گۆت: (ھزرا چێکرنا ڤێ یەکێ ل ھندێ ھات کو ژنان دمال دا گەلەک ماندوبون ب شوشتنا مەخفیران ڤە دبر،ژبەرڤێ من ئەڤ داھێنانە درۆستکر، نھا ھەر کەس دکاریت ئەڤی ئامیرەی لدەڤ من داخواز بکەت و دماوەێ چوار رۆژان بو درۆست دکەم).
ھەر چەندە ئەوی وەلاتی نھێنیا چێکرنا ئەوی ئامیری دیارنەکر داکو نەھێتە کوپیکرن و زێدەتر گۆت: (ژبلی شوشتنا مەخفیران د ھەمان دەم دا کابانی دشێن ناڤمالێ و کاشی و حەوشا مالێ ژی پێ بشون ، و مرۆڤ دشێت فرچەیێن وێ نزم و بلند بکەت و ب شەڤ ژی کار بکەت و ب ھەردوو کارەبێن مالیدەی و گشتی کاردکەت و دەنگەکێ زور نزم ژی ھەیە، و بو کەس و کارێن شەھید و وان کەسانێن دەستکورت ھەتا 170 ھزار دیناران ژی کارم درۆست بکەم بەلێ بو یێن دن 200 ھزار دیناران ژبەرکو ئامیر ب گەرنتی چێدکەم و تشتەکێ نویە و کارەکێ ب زەحمەتە).
ناڤبری ل سەنتەرێ ناحیا شێلادزێ یا سەر ب قەزا ئامێدیێ دژیت و خودان خێزانە و چەند زارو ھەنە و ژبلی کارێن میکانیکی و کارەبای چوو کارێن دن ناکەت و پێشتریش چەند داھێنانەکێن دن درۆستکرینە.