گوگل 39 كه‌نال و هژمارێن سه‌ر به حوكمهتا ئيرانی ڤه بلۆك دكه‌ت
ئه‌ڤرۆنيوز:
كۆمپانيا گوگل راگه‌هاند، 39 كه‌نال وهژمارێن بكاربه‌ران يێن ب سه‌ر حوكمهتا ئيرانى ڤه بلۆك كرن كو ل مالپه‌رێ يوتيۆبى يێ ب سه‌ر كۆمپانيا گوگل ڤه چالاكى هه‌بوون.
ئاژانسا رويته‌رز به‌لاڤكر” كۆمپانيا گوگل شه‌ش وێبلاگ و13 هژمارێن دى يێن ب سه‌ر حوكمهتا ئيرانێ ڤه ل گوگل پلاس بلۆك كرن وداخستن”.
گوگلى ل دۆر ڤێ چه‌ندێ ئاشكراكر” هه‌موو كه‌نال وهژمار ومالپه‌رێن كو ژلايێ كۆمپانيێ هاتينه داخستن وبلۆك كرن، به‌رده‌وام بابه‌تێن سياسى دژى ئه‌مريكا به‌لاڤ دكرن، به‌لێ ناسنامه وپه‌يوه‌نديا خوه ب ده‌زگه‌هێن ده‌نگ وره‌نگ يێن فه‌رمى يێن ئيرانێ ڤه دڤه‌شارت”.
ده‌زگه‌هێ ده‌نگ وره‌نگ يێ فه‌رمى يێ ئيرانى راسته‌وخوه ل بن ده‌ستهه‌لاتا نڤيسينگه‌ها عه‌لى خامه‌نه‌ئى رێبه‌رێ ئيرانێ كار دكه‌ت.
هه‌ڤده‌م به‌لاڤۆكا (پۆليتيكۆ) دراپۆرته‌كێ دا نڤيسى” كۆنت واكر جێگرێ رێڤه‌به‌رێ گشتيێ كۆمپانيا گوگل بۆ كاروبارێن جيهانى، ده‌نگوباسێ بلۆك كرنا وان هژماران پشت راستكر”.
ئه‌ڤ بزاڤێن كۆمپانيا گۆگل دده‌مه‌كى دانه كو به‌رى چه‌ند رۆژان، هه‌ردو كۆمپانيا زه‌به‌لاح يێن دبوارێ تۆرێن جڤاكى دا (فه‌يسبووك وتويته‌ر) راگه‌هاندبوو كو ب سه‌دان هژمار وگرۆپ ل تۆرێن خوه داخستينه وبلۆك كرينه كو بانگه‌شه بۆ سياسه‌تا كۆمارا ئيسلامى يا ئيرانێ ل دژى ئه‌مريكا دكر.