هێرۆيێ هه‌لويستێ خوه ل دۆر پۆستێ سه‌رۆكاتيا كۆمارێ راگه‌هاند
ئه‌ڤرۆنيوز:
هيرۆ ئيبراهيم ئه‌حمه‌د، ئه‌نداما مه‌كته‌با سياسى يا ئێكه‌تى نيشتمانى كوردستان ب رۆهنكرنه‌ك به‌لاڤكر وتێدا ب شێوه‌كێ نه‌راسته‌وخوه دژايه‌تيا خوه بۆ ده‌نگۆيێن به‌ربژاركرنا به‌رهه‌م سالح بۆ پۆستێ سه‌رۆك كۆمارا عيراقێ راگه‌هاند.
هێرۆيێ شه‌ڤا ئه‌ڤرۆ شه‌مبيێ 1/9/2018 رۆهنكرنه‌ك به‌لاڤكر وتێدا ب سێ خالان به‌حسێ چوونا شاندێ كوردى بۆ به‌غدا ودانوستاندنێن وى ل گه‌ل لايه‌نێن سياسى يێن عيراقى وپێكئينانا كابينا نوو يا حوكمه‌تا عيراقێ وئه‌و پۆستێن كو ل به‌ر كوردان دكه‌ڤن دكه‌ت.
دپشكه‌كا وێ رۆهنكرنێ دا، هيرۆ ئيبراهيم ئه‌حمه‌د به‌حسێ پۆستێ سه‌رۆك كۆمارا عيراقێ دكه‌ت وئاماژه كر كو گه‌له‌ك يا گرنگ وپێدڤيه ئێكه‌تى نيشتمانى كوردستان وى پۆستى وه‌ربگريت وب رێككه‌فتن بيت ل گه‌ل برايێن پارتى ديموكراتى كوردستان.
سه‌باره‌ت ب وى كه‌سێ ئێكه‌تى به‌ربژار دكه‌ت بۆ وى پۆستى. هيرۆ دبێژيت” دڤێت سه‌ركردايه‌تيا ئێكه‌تيێ هه‌ڤاله‌كێ ب ئه‌زموون وپێگير وخه‌باتكه‌ر وژ رێبازا مام جه‌لالى نه‌هاتبيته دابران، به‌ربژاركه‌ت”.
