پەرلەمان دێ پڕۆژە قانوونەکێ بۆ پاراستنا مافێن نەخۆشان دەرکەت
ئه‌ڤرۆ نيوز:
بڕیارە سوبەھی رۆژا دوشەمبی 3-9-2018ێ پەرلەمانێ کوردستانێ کۆمببیت و ئەندامەکا لیژنا ساخلەمیێ ژی ئاشکرا کر کو د ڤێ خۆلا پەرلەمانی دا ھژمارەکا پڕۆژە قانوونێن گرێدای کەرتێ ساخلەمیێ دێ ھێنە پەسەندکرن و گۆت: “ئێک ژ وان پرسێن پەرلەمان دخوازیت چارەسەر بکەت بابەتێ مافێ نەخۆشیە ل نەخۆشخانێن گشتی و تایبەت”.
ئاواز حەمید، ئەنداما لیژنا ساخلەمیێ ل پەرلەمانێ کوردستانێ بۆ رۆژناما ئەڤرۆ دیار کر کو بڕیارە سوبەھی رۆژا دوشەمبی پەرلەمانێ کوردستان دەست ب کۆمبوونێن خوە بکەت و ل گورەی ئەو پێزانینێن ژ سەرۆکاتیا پەرلەمانی گەھشتینە وان، ئێک ژ وان پڕۆژە قانوونێن گرنگ کو بڕیارە بھێتە پەسەندکرن ل پەرلەمانی دێ پڕۆژە قانوونا کەرتێ ساخلەمیێ بیت و بەری نوکە ئەڤ پڕۆژە قانوونە ھاتبوو بەرھەڤکرن و خواندنا ئێکێ ژی بۆ ھاتبوو کرن، بەلێ ژ بەر کاودانێن پەرلەمان تێدا دەربازبووی دەلیڤا خواندنا دویێ و پەسەندکرنێ نەبوو.
ناڤھاتیێ ئاماژە دا وێ چەندێ کو ل گورەی پڕۆژە قانوونێ ئیدی مافێ نەخۆشان ناھێتە بنپێکرن ل کەرتێ ساخلەمیێ و قانوونێ سنوور و سزایێن خوە داناینە بۆ دانا مافێن نەخۆشی ل کەرتێ گشتی و یێ تایبەت، د ھەمان دەم دا مافێ نۆشداری و کارمەندێن ساخلەمی دپاراستینە ل گورەی قانوونێ، لەوڕا ب دەرکرنا قانوونێ دێ مفایەکێ زۆر ھەبیت بۆ وەلاتیان و دێ پتریا ئاریشێن بەرێ ھەین ھێنە چارەسەرکرن.
