جێگرێ پارێزگارى: ھەتا نوکە چو فەرمان بۆ تمامکرنا پرۆژێن دھۆکێ نەگەھشتینە مە
ئەڤرۆ نيوز:
جێگرێ پارێزگارێ دھۆکێ بۆ رۆژناما ئەڤرۆ ئاشکرا کر کو نوکە نێزیکی 150 ھەتا 200 پرۆژان ل پارێزگەھا دھۆکێ ژ بەر قەیرانا دارایی یێن ھاتینە راوەستاندن و گۆت: “ھەتا نوکە چو فەرمان بۆ تمامکرنا ڤان پرۆژان نەگەھشتینە مە”.
ئوسمان یونس، جێگرێ پارێزگارێ دھۆکێ دیار کر نوکە نێزیکی 150 ھەتا 200 پرۆژان ل پارێزگەھا دھۆکێ ھەنە کو بەری قەیرانا دارایی ب سەر ھەرێمێ دا بھێت ب رێژا 5% ھەتا 90% کار تێدا ھاتبوو ئەنجامدان، لێ پشتی قەیرانا دارایی پەیدابووی کار د چێکرنا ڤان پرۆژان دا ھاتبوو راگڕتن، لێ ھندەک پرۆژێن گەشەپێدانێ ھەنە نوکە بەلێندەر ب قەڕ چێدکەن و گۆت: “ھەتا نوکە بەلێندەران ب کۆژمێ 12 ملیار دیناران پرۆژێن گەشەپێدانێ ب قەڕ بوو مە چێکرینە”.
ناڤھاتی ئاماژە دا وێ چەندێ کو ب مەرەما دووڤچوونا پارێ بەلێندەران وی سەرەدانا وەزارەتا دارایی و ئابووری یا حوکمەتا ھەرێما کوردستانێ کریە و وەزارەتا ناڤھاتی گۆتیێ کو بەحسێ ھەی پارێ بەلێندەران بھێتە مەزاختن، لێ ھەتا نوکە نەبوویە بڕیار و چو رێنمایی ژی پێ دەرنەکەفتینە و گۆت: ” ھەتا نوکە چو فەرمان بۆ تمامکرنا پرۆژێن پارێزگەھا دھۆکێ نەگەھشتینە مە”.
جێگرێ پارێزگارێ دھۆکێ خویا کر کو نوکە کار د ھندەک پرۆژان دا دھێتەکرن کو ل سەر داھاتێ وەزارەتان دھێنە بجە ئینان، ژ وان پرۆژان نوکە پرۆژێ جادا خزمەتگۆزاریا ئێتیتێ ب کۆژمێ 800 ملیۆن دیناران ژ داھاتێ باژێرڤانیا دھۆکێ دھێتە بجە ئینان.
