ئیسرائیل گه‌فێن هێرشكرنێ ل سه‌ر هێزێن ئيرانى ل عيراقێ دكه‌ت
ئه‌ڤرۆنيوز:
وه‌زيرێ به‌رگريا ئيسرائيلێ گه‌فێن هێرشكرنێ ل سه‌ر عيراقێ دكه‌ت ورادگه‌هينيت، دبيت ئيسرائيل وه‌كو هێرشێن ل سه‌ر سووريێ، هێرشان بكه‌ته سه‌ر هه‌ر يه‌كه‌يه‌كا له‌شكرى كو گومانێ لێبكه‌ت ئيرانى بيت ول عيراقێ هاتبيته جێگيركرن.
ئاژانسا رويته‌رز به‌لاڤكر كو ئه‌ڤيدۆر ليبه‌رمان، وه‌زيرێ به‌رگريا ئيسرائيلێ دكۆنگره‌كێ رۆژنامه‌ڤانى دا ل ئورشه‌ليم راگه‌هاند” ئه‌م ب هوورى چاڤدێريا روودانێن سووريێ دكه‌ين، سه‌باره‌ت گه‌فێن ئيرانێ ژى ئه‌م تنێ خوه ل سووريێ كورت ناكه‌ين”.
دبه‌رسڤا پرسياره‌كێ دا، كو ئايا ئه‌و گه‌ف عيراقێ ژى ڤه‌دگرن، كو ل دووڤ ژێده‌رێن ئاژانسا رويته‌رزێ، بريكارێن شيعێن ئيرانێ ل عيراقێ، چه‌ندين مووشه‌كێن پاليستى ڤه‌گوهاستينه، لێبه‌رمان گۆت” ئه‌م ره‌فتارا له‌شكرى ل گه‌ل هه‌ر گه‌فه‌كا ئيرانێ دكه‌ين ويا گرنگ نينه ژێده‌رێ وێ ل كيرێ يه، چونكى ئه‌م ئازاديا كارێ خوه دپارێزين”.
