عەدنان کەرکووکی: بیێ دەستھەڵات پارتی ناڤەگەڕیت کەرکووکێ

ئه‌ڤرۆ نيوز:

بەرپرسەکێ پارتی رەتکر پارتی دیموکراتی کوردستان بێی دەستھەلات ڤەگەڕیت بۆ کەرکووکێ و دیارکر، کەرکووک یا داگیرکریە و بێی ئاسایی کرنا رەوشا کەرکووکێ و دوماھی ئینان ب پرۆسا داگیرکریێ پارتی ناڤەگەڕیت کەرکووکێ، چونکە مەرجێ ڤەگەڕیانا پارتی ئەڤە پێشمەرگە بچیتە کەرکووکێ و ئالایێ کوردستانێ یێ بلندبیت.

عەدنان کەرکووکی، پەیڤدارێ جڤاتا سەرکردایەتیا پارتی ل کەرکووکێ بۆ رۆژناما ئەڤرۆ گۆت” بزاڤێن پارتی بۆ ئاسایی کرنا رەوشا کەرکووکێ بەردەوامن ب ئاراستەیێ بجە ئینانا دستوورێ عێراقێ، چونکە مەرجێ سەرەکیێ پارتی بۆ پشکداریکرن د حوکمەتا نوویا عێراقێ ئاسایی کرنا رەوشا دەڤەرێن داگیرکریە د ئێکەم سەرەدانا شاندێ بلندێ پارتی بۆ بەغدا ئەف بابەتە دگەل لایەنێن عێراقی ھاتیە بەحسکرن یێن د ھەلبژارتنێن دوازدەی ئایاری بۆری سەرکەفتن بدەستڤە ئینایە، پێدڤیە رەوشا دەڤەرێن کوردستانی یێن ھاتینە داگیرکرن بھێتە ئاسایی کرن وەک بەرێ، ھەروەسا ھێزێن پێشمەرگەی ڤەگەڕن بۆ کەرکووکێ و سنورێ کوردستانێ، ژبەرکو گورەی مادێ 140 یێ دستوورێ عێراقێ دڤێت ھەرێما کوردستانێ و بەغدا پێکڤە ئیدارەیا دەڤەرێن سنورێ مادی 140 بکەن ھەتا ئەڤی دەمێ چارەنڤیسێ وان دھێتە ئێکلاکرن.

پەیڤدارێ پارتی ل کەرکووکێ دیارکر” ھەگەر بھێت و گورەی ئەڤان مەرجێن پارتی بۆ دانوستانان دیارکری بگەھینە رێکەفتنێ دگەل لایەنێن عێراقی بۆ پێک ئینانا کابینا حوکمەتێ، ئەڤە دێ پارتی ب دەستھەلاتڤە ڤەگەڕین کەرکووکێ، جڤاتا پارێزگەھێ دێ ھێتە کاڕاکرن و پارێزگارێ کەرکووکێ دێ دەست ب کارێ خوە بکەت، چونکە پارتی وی دەمی دێ ڤەگەڕیت کەرکووکێ دەمێ دەستھەلات ھەبیت و بشێت بەڕەڤانیێ ل خەلکی بکەت، نەوەکی نوکە دەستھەلاتەکا سەربازی ل کەرکووکێ ھەبیت ب کەیفا خوە بڕیارا بدەن.

ل دۆر ڤەکێشانا ھێزێن حەشدا شەعبی ل کەرکووکێ عەدنان کەرکووکی گۆت” راستە بەری نوکە بڕیارەکا وەسا ھەبو ھێزێن حەشدا شەعبی بھێنە ڤەکێشان ل دەڤەرێن سونە نشین و کوردان، بەلێ ھەتا نوکە ھێزێن حەشدا شەعبی ل کەرکووکێ ماینە و نەھاتینە ڤەکێشان، ئەم گەھشتینە ڤێ باوەریێ حەشدا شەعبی ناھێتە ڤەکێشان، چونکە مەرەما ھاتنا حەشدا شەعبی بۆ کەرکووکێ پیلانێن خوە ھەبووینە ھەتا دەڤەرێن کوردی بھێنە تەعریب کرن و ھێشتاژی ب عەرەبکرن و ب شیعەکرنا کەرکووکێ یا بەردەوامە، خویایە پتریا ھێزێن حەشدێ یێن ھاتینە کەرکووکێ ھەموو ئەف ھێزن یێن نێزیکی ئیرانێ و دژی مافێن کوردان کار دکەن، ھندەک جارا ل دەزگەھێن راگەھاندنێ بەلاف دبیت فلان ھێزا حەشدا شەعبی خوە ڤەکێشا، بەلێ د بنەڕەتدا چو ھێزەک نەھاتیە ڤەکێشان ب جورەھا شێوە یێن کەفتینە دژایەتیکرنا کەرکووکێ و ئەو بخوە پشکەکن ژ دزی و تالاکرن و تێکدانا رەوشا ئەمنیا کەرکووکێ.

کۆمێنتا تە