ئەمبۆلانس بۆ ناڤ کەمپان دھێنە بەرھەڤکرن
ئه‌ڤرۆ نيوز، له‌زگين جۆقى:
رێڤەبەرێ گشتی یێ ساخلەمیا پارێزگەھا دھۆکێ دیارکر کو پرۆژی پشتەڤانیا ھەیڤا سور و خاچا سور یا نەرویجی بۆ کەمپێن پەنابەران ل پارێزگەھا دھۆکێ دی یێ بەردەوام بیت.
د. نزار عصمەت تەیب، رێڤەبەرێ گشتی یێ ساخلەمیا پارێزگەھا دھۆکێ دیارکر کو بەرنامە ھەیە سووتنگەھەکێ بۆ چارەسەرکرنا پاشمایێن ساخلەمیێ ژی دروست بکەن بەری پاشمایێن ساخلەمیێ بھێنە ھاڤێتن دێ ل وێ سووتنگەھێ ھێنە چارەسەرکرن.
رێڤەبەرێ گشتی یێ ساخلەمیێ سۆپاسیا وان کر، “داخوازا بەردەوامیێ دکەین چونکو رێڤەبەریا گشتی یا ساخلەمیا دھۆکێ پێدڤی ڤان جۆرە پشتەڤانیایە ژ بەر کو مە ئەو شیان نینن ھەموو بنگەھێن ساخلەمیێ ل ھەموو کەمپان بھێنە برێڤەبرن ھەکە پشتەڤانیا نێڤدەولەتی و رێکخراوان نەبیت ژ بەر ھندێ ئەم داخوازا بەردەوامیا پشتەڤانیێ دکەین ژ ھەموو رێکخراوان ھەڤکار و پشتەڤان بن بۆ برێڤەبرن و ئینانا دەرمان و پێدڤیێن نوشداری بۆ ساخلەمیێ”.
ھەیسەم عەبدی، بەرپرسێ سەنتەرێ ھاوارھاتنا ب لەز ١٢٢ ل پارێزگەھا دھۆکێ دیارکر کو ھەیڤا سۆر یا عیراقی ب ھەماھەنگیی د گەل خاچا سور یا نەرویجی رابووینە ب ئینانا ھژمارەکا ئامیرێن نوشداری یێن ترۆمبێلێن ھاوارھاتنی بۆ پارێزگەھا دھۆکێ د گەل کەلوپەلێن نوشداری یێن د ناڤ ئەمبولانسان دا بۆ سێ ترۆمبێلان کەرەستێن ساخلەمیێ و ئامیرێن نوشداری ئیناینە ئەڤ ھەرسێ ترۆمبێلە بۆ کەمپێن پەنابەرانە و چەندین گەرەستێن یەدەک ژی ئیناینە بۆ ترۆمبێلێن ھاوارھاتنێ دێ مفایەکێ باش گەھینیتە کەمپان.
ئاشکرا کر کو ل سەرانسەری پارێزگەھا دھۆکێ ١٨٨ ترۆمبێلێن ئەمبولانس ھەنە و سەنتەرێ ھاوار ھاتنا ب لەز ٥٥ ترۆمبێل ھەنە و ١٥ ئەمبولانس ل کەمپێن ئاوارە و پەنابەرانن خزمەتێ پێشکێش دکەن، “رێژا زۆر یا ئاوارە و پەنابەران گەلەک بارگرانی ل سەر مە دروست کریە و فشار ل سەر مە دروست بوویە، ئەڤ ترۆمبێلێن ھاوارھاتنی ژی ئەڤە چەندین سالن خزمەتی دکەن ئەم پێدڤی ب ترۆمبێلێن نوو ھەینە ئەم داخوازی دکەین رێکخراو پشتەڤانیێ بکەن ھەتا ئەم ژی بشێین باشتر خزمەتا نەخۆشان بکەین”.
رەمەزان حەمید، نوونەرێ ھەیڤا سورا عیراقی ل پارێزگەھا دھۆکێ دیارکر کو دەست ب پرۆژێ پشتەڤانیا ساخلەمیێ ھاتە کرن ئەڤرۆ سێ ترۆمبێلێن ھاوارھاتنا ب لەز ١٢٢ ھاتنە ئامادەکرن بۆ کەمپا دومیز ئێک و دومیز دو د گەل مەشقدانا ١٢ کەسان بۆ کارکرنێ د گەل ساخلەمیێ ل ناڤ کەمپان بۆ خزمەتکرنا نەخۆشان مەرەم پێ ئەو فشارا ل سەر کەرتێ ساخلەمیێ ھەیی پیچەکێ سڤک بکەین و پەنابەرێن ل ناڤ کەمپان ھاریکاریا خوە بکەن و ئەو ب خوە چاڤدیریا نەخۆشێن خوە بکەن ھەروەسا ھندەک پرۆژێن دی ھەنە ژ وانا ژی ژوورا تەنگاڤیان ل کەمپا دومیز ١ و ٢ و و دابینکرنا پێدڤیێن ساخلەمیێ بۆ کەمپان ھەروەسا پرۆژی چارەسەرکرنا بەرمایکان ژی ھەیە ئەڤ پرۆژە دێ ب ھاریکاریا ساخلەمیا دھۆکێ ھێتە چێکرن.
