جێگرێ سەرۆکێ ھاکپارێ بۆ ئەڤرۆ: %80 پەرلەمانتارێن ھەدەپێ تورکن و پرسا کوردی د خەما وان دا نینە
ئه‌ڤرۆ نيوز:
جێگرێ سەرۆکێ ھاکپارێ ل تورکیا دیار دکەت کو ٨٠% پەرلەمانتارین ھەدەپێ تورکن و پرسا کوردی د خەما وان دا نینە و ژ بەر ھندێ ژی نھا ل پەرلەمانێ تورکیا چو ھێزەک نینە کو بەرگیریێ ل مافێ کوردان بکەت، ل ئالیێ دی ژی گوھۆڕینا سیستەمێ تورکیا بۆ سەرۆکاتیێ ژی د بەرژەوەندیا کوردان دا نەبوو.
لەتیف ئەپ ئۆزدەمیر جێگرێ سەرۆکێ پارتیا ماف و ئازادیان (ھاکپار) ل تورکیا د دیدارەکا تایبەت دا ل گەل رۆژناما ئەڤرۆ دیار کر کو رەوشا کوردان ل تورکیا و باکورێ کوردستانێ نھا گەلەکێ خرابە، چونکو یا ئێکێ سیستەمێ تورکیا بۆ سەرۆکاتیێ ھاتە گوھۆڕین و نھا بابەتێ پرسا کوردی د بەرنامێ دەولەتا تورکیا دا نینە و ھەموو دەستھەلات کەفتینە دەستێ ئەردۆگانی دا و گۆت: (د سیستەمێ سەرۆکاتیێ یێ گەلەک وەلاتان دا دەستھەلاتا ھەرێمان ھەیە، لێ مخابن ل تورکیا دا ئەو یەک نینە و دەولەتا تورکیا ب چو رەنگەکێ ئامادە نینە کو دانپێدانێ ب مافێن گەلێ کورد بکەت).
ناڤبری د پشکەکا دی یا ئاخڤتنا خوە دا ئەو یەک ژی دیار کر کو ل پەرلەمانێ تورکیا چو ھێزەک نینە کو بەرگیریێ ل مافێ کوردان بکەت، پەرلەمانتارێن ھەدەپێ یێن ل پەرلەمانێ تورکیا ٨٠% ژ وان تورکن و پرسا کوردی و مافێن کوردان د خەما وان دا نینە، ھەتا نھا ژی ژ بۆ مافێن نەتەوی یێن گەلێ کورد ل باکورێ کوردستانێ چو نەکرینە و ژ بەر ھندێ ژی ئەز دشێم بێژم کو نھا کورد ل باکورێ کوردستانێ بێ خوەدانن و گۆت: (چەند پارتێن نەتەوی و کوردی ل باکورێ کوردستانێ ھەنە، لێ مخابن دەولەتا تورکیا و پەکەکە رێ نادەن ئەو چالاکیێن خوە بکەن، ژ بۆ تورکیا وەسا باشە کو پارتەک وەکو ھەدەپێ ھەبیت و خەباتێ بکەت و وەسا دیار بکەت کو بۆ کوردان کار دکەت، لێ د راستی دا ھەدەپە پارتەکا کوردی نینە و چو بەرنامێن خوە بۆ چارەکرنا پرسا کوردان ل باکورێ کوردستانێ و تورکیا ژی نینە).
جێگرێ سەرۆکێ پارتیا ماف و ئازادیان ل تورکیا د دووماھیا ئاخڤتنا خوە دا ئەو یەک ژی دیار کر کو نھا رەوشا ئابووری یا تورکیا گەلەکێ خرابە، لیرێ تورکیا ل ھەمبەر دۆلارێ ئەمریکا رۆژ ب رۆژێ پتر بھایێ خوە ژ دەستان ددەت و مخابن ھەتا نھا دەولەتا تورکیا چو بەرنامەیەک بۆ چارەکرنا قەیرانا ئابووری ژی نینە و گۆت: (ھەکە وەسا بەردەوام بکەت ھەتا سێ مەھێن دی ئێدی دەولەتا تورکیا نەشێت مووچێن فەرمانبەرێن خوە ژی دابین بکەت و رەنگە رەوشا ناڤخوەیی یا تورکیا دێ گەلەکێ ئالۆز بیت، لێ مخابن ھەتا نھا ژی بێدەنگیەکا مەزن یا ھەی و کەس نزانیت کا دێ چارەنڤیسێ تورکیا بەر ب کیڤە بچیت، ھەکە ھەتا سی مەھێن دی رەوش باش نەبیت دێ کارەساتێن مەزن ل تورکیا روو دەن، چونکو تورکیا نەشێت ب ڤێ رەوشا خوە یا خراب بەردەوام بکەت و رەنگە وەلاتیێن تورکیا ل دژی سیاسەتا دەولەتێ د بیاڤێ ئابووری دا دەست ب خوەنیشادانان بکەن).
