دادگه‌ها فيدرال بڕياره‌كا نوو ل دۆر په‌ترۆلا هه‌رێما كوردستانێ ده‌ردكه‌ت
ئه‌ڤرۆ نيوز:
دادگه‌ها بلندا فيدرالا عيراقێ، بڕيار دا، سێ شاره‌زا بهێنه دياركرن دا كو راپۆرتا ته‌كنيكى د ده‌رباره‌يى تانێن وه‌زاره‌تا په‌ترۆلێ دا ل دۆر ده‌رخستنا په‌ترۆلێ ل هه‌رێما كوردستانێ و فرۆتنێ ئاماده بكه‌ن، هه‌ڤده‌م روونشتن بۆ 16ى چريا ئێكێ 2018 هاته پاشخستن.
ئلياس سامۆك، ئاخفتنكه‌رێ ب ناڤێ دادگه‌هێ، د راگه‌هاندنه‌كێ دا كو وێنه‌ك ب ده‌ست ئه‌ڤرۆ نيوز كه‌فتيه، راگه‌هاند: “دادگه‌ها بلندا فيدرال ب سه‌رۆكاتيا ميدحه‌ت مه‌حمود و ئاماده‌بوونا هه‌موو دادوه‌رێن وێ، دادبينى د وێ داخوازيێ دا كريه كو وه‌زيرێ په‌ترۆلێ د ده‌رباره‌يى ده‌رخستنا په‌ترۆلێ ژ لايێ هه‌رێما كوردستانێ ڤه پێش كێش كرينه”.
ئاماژه ب وێ چه‌ندێ ژى كر كو روونشتن ب ئاماده‌بوونا بريكارێن سكالاكه‌ر و لايه‌نێ سكالالێكرى و بڕيكارێ سه‌رۆكێ جڤاتا وه‌زيرێن عيراقێ وه‌زاره‌تا دارايى ل گه‌ل سه‌رۆكێ جڤاتا وه‌زيرێن هه‌رێما كوردستانێ برێڤه‌چوو.
د وێ روونشتنێ دا، دادگه‌هێ بڕيار دا، سێ شاره‌زا بهێنه دياركرن بۆ ئاماده‌كرنا راپۆرتا ته‌كنيكى: “سێ شاره‌زا ژ لايێ سه‌نديكا ئابۆريناسێن عيراقێ، سه‌نديكا جيولۆجيان و كۆمه‌لا ئه‌نده‌زيارێن عيراقێ، كانديد دهێنه كرن بۆ پشت ب شاره‌زايا وان بهێته به‌ستن”.
ئاشكه‌را ژى كر كو راسپاردنا شاره‌زايان و سووندخوارنا قانوونيان ژ 9ى چريا ئێكێ 2018ێ دبيت، روونشتن بۆ رۆژا 6ى چريا دويێ 2018 هێته پاشخستن بۆ وێ چه‌ندێ شاره‌زا راپۆرتا خوه ئاماده بكه‌ن”.