سەرۆك بارزانی په‌يامه‌كێ به‌لاڤ دكه‌ت
ئه‌ڤرۆنيوز:
سه‌رۆك مه‌سعود بارزانى ب هه‌لكه‌فتا سه‌ركه‌فتنا ليستا 183 يا پارتى ديموكراتى كوردستان دهه‌لبژارتنێن په‌رله‌مانێ كوردستانێ، ئه‌ڤرۆ پێنجشه‌مبى 4/10/2018 په‌يامه‌ك به‌لاڤكر وتێدا پيرۆزباهى جه‌ماوه‌رى وهه‌موو ئه‌ندام ولايه‌نگر وكادرێن پارتى كر.
سه‌رۆك بارزانى دپه‌ياما خوه دا دبێژيت” ب هه‌لكه‌فتا سه‌ركه‌فتنا پرۆسا هه‌لبژارتنێن په‌رله‌مانێ كوردستانێ ل 30 ئه‌يلوولا 2018 پيرۆزباهيێ ل هه‌موو خه‌لكێ كوردستانێ دكه‌م وب هه‌لكه‌فتا سه‌ركه‌فتنا ليستا پارتى ديموكراتى كوردستان پيرۆزباهيێ ل جه‌ماوه‌رێ سه‌ربلند وخۆراگر وهه‌موو ئه‌ندام ولايه‌نگر وكادر وهه‌وادارێن پارتى ديموكراتى كوردستان دكه‌م، جهێ خوه‌شحاليێ يه كو وه‌لاتى دپرۆسه‌كا ديموكراسى دا ده‌نگێ خوه دا وباشترين رێ ژى بۆ ده‌ستاوده‌ستكرنا ده‌ستهه‌لاتێ سندووقێن ده‌نگدانێ نه”.
سه‌رۆك بارزانى زێده‌تر گۆت” سه‌ركه‌فتنا پرۆسا هه‌لبژارتنان، سه‌ركه‌فتنا هه‌موو گه‌لێ كوردستانێ يه، هشياريا سياسى يا خه‌لكى پێش دئێخيت وكاريگه‌رى ژى يا هه‌ى ل سه‌ر بلندتربوونا پێگه وناڤوده‌نگيا هه‌رێما كوردستانێ”.
سه‌رۆك بارزانى دپه‌ياما خوه دا داخوازه‌ك ئاراسته‌ى هه‌موو خه‌لكێ كوردستانێ وب تايبه‌ت جه‌ماوه‌رێ پارتى كر وگۆت” دده‌ربرينا خوه‌شيێ دا پێگيريێ ب بنه‌مايێن قانوونێ وئاسه‌ده‌يا وه‌لاتيان بن وخوه ژ ته‌قه‌كرنێ وكريارێن نه‌شارستانى ب پارێزن”.
گۆت ژى” دبيت گه‌له‌ك كه‌س ولايه‌نێن سياسى ل هه‌رێمێ ره‌خنه وتانه وتێبينى ل سه‌ر هه‌بوونا پێشێلكارى وسه‌رپێچى وسه‌خته‌كاريێ هه‌بيت، كو ل رۆژا هه‌لبژارتنان هاتبنه ئه‌نجامدان، له‌وما داخوازێ ژ كۆمسيۆنا بلند يا هه‌لبژارتنێن كوردستانێ دكه‌م دووڤچوونا هوور وجدى بۆ سكالا وسه‌رپێچيان بكه‌ت وب چو شێوه‌كى رێ ب ده‌ربازكرنا سه‌خته‌كاريێ وپێشێلكاريێ نه‌هێته دان وراستى بهێنه به‌رچاڤكرن”.