پەرلەمانێ ئورۆپا: دڤێت ناڤەرۆکا رێککەفتنا ئدلبێ بھێتە ئاشکرا کرن
ئەڤرۆ نيوز:
پشتی کو چەندین دەزگەھێن راگەھاندنێ دیار کرن کو گرۆپێن چەکدار یێن ل ئدلبێ دەست ب دەرکەفتنا ل وی باژێری کرینە، پەرلەمانێ ئورۆپا ژی د داخۆیانیەکێ دا راگەھاند کو دڤێت جھێ مانا وان چەکداران بۆ رایا گشتی ئاشکرا بیت، ھەروەسا دڤێت ئەو چەکدار پاشی نەبنە مەترسی بۆ چو دەڤەرێن دی یێن سووریێ، ژ بەر ھندێ ژی دڤێت ناڤەرۆکا رێککەفتنا تورکیا و روسیا ل دۆر ئدلبێ بۆ رایا گشتی یا جیھانێ بھێتە ئاشکرا کرن.
د داخۆیانیێ دا ئەو یەک ژی ھاتیە دیار کرن کو ئەو چەکێن گران یێن د دەستێ گرۆپێن چەکدار یێن ل ئدلبێ دڤێت ل ژێر چاڤدێریا نەتەوێن یەکگرتی ژ وان بھێتە وەرگرتن و نابیت ئەو چەک جارەکا دی بکەڤنە دەستێ وان، چونکو ھەبوونا وان چەکان دشێت ھەموو دەمەکێ مەترسیێ بۆ سووریێ یان وەلاتەکێ دی دروست بکەت، ژ بەر ھندێ ژی دڤێت روسیا و تورکیا ناڤەرۆکا رێککەفتنا خوە ل دۆر ئدلبێ بۆ رایا گشتی ئاشکرا بکەن، چونکو ھەر دو وەلات نەشێن بێژن ب ئاڤاکرنا ھەرێمەکا ئارام دێ شێن قەیرانا گرۆپێن چەکداری یێن ل ئدلبێ چارە کەن.
ل ئالیێ دی دوھی دەزگەھێن راگەھاندنا تورکیا ژی دیار کرن کو رێککەفتنا تورکیا و روسیا ل دۆر ئدلبێ ب رەنگەکێ باش برێڤە دچیت و دوھی گرۆپێن چەکدار پرانیا چەکێن خوە ژ ئدلبێ دەرخستینە، لێ بەحسێ ھندێ نەھاتیە کرن کا ئەو چەک بۆ کیڤە برینە و تنێ ھاتیە گۆتن بۆ ھەرێمەکا ئارام ل سووریێ برینە کو بەری نھا روسیا و تورکیا ل دۆر ھندێ بریارا خوە دابوون.
چاڤدێرێن سیاسی ژی دیار دکەن کو ھەکە ئەمریکا و روسیا ل دۆر قەیرانا سووریێ د ناڤا خوە دا نەگەھنە رێککەفتنەکێ، ئەو گرۆپێن جیھادی دشێن ببنە مەترسی بۆ سووریێ، چونکو پرانیا وان گرۆپێن چەکداری سەر ب تورکیا نە و تورکیا دشێت وان بۆ بەرژەوەندیێن خوە و ئالۆزکرنا رەوشا سووریێ ل دژی ئەمریکا بکار بینیت.