بەرپرسەکێ ھەڤپەیمانیێ: پۆستێ سەرۆک کۆماری دەرزەکا دیتر ل ناڤمالا کوردان پەیدا کر
ئه‌ڤرۆ نيوز:
بەرپرسەکێ حزبا ھەڤپەیمانی بۆ دیموکراسی و دادپەروەریێ دبێژیت، میکانیزما دانانا سەرۆک کۆمارێ عیراقێ ناڤمالا کوردی پرت و بەلاڤکر، کو نابیت بوێ میکانیزمێ پۆستێ سەرۆک کۆمارێ عیراقێ ھاتبا پڕکرن، کو دوجاران زیانێ ب پێگەھێ کوردان دگەھینیتن، زێدەباری کارێکتەرێ سەرۆک کۆماری ھەکە ب پشتەڤانیا کوردان نەبیت سەرکەفتنێ دکارێن خوەدا نا ئینیت.
ئەندامێ جڤاتا ب رێڤەبرنێ یا حزبا ھەڤپەیمانی، عوسمان گۆلپی تایبەت بۆ رۆژناما ئەڤرۆ گۆت: مە ھیڤی دخواستن کوردەک بۆ پۆستێ سەرۆک کۆمارێ عیراقێ بھێتە ھەلبژارتن، بەلێ ئەو پۆست نەبیتە ھوکارێ جودا بوون و دەرزەک بۆ ناڤمالیا کورادن، ب مخابنی ڤە یا نوکە ئەم دبینین کورد ل سەر پۆستێ سەرۆک کۆماری دئێکگرتی نینە، و بەحسێ دەرزا ناڤمالیا کوردان دکەن.
ب باوەریا عوسمان گۆلپی: ھەر پۆستەکێ ل بەغدا کو کورد ب رێڤەببەن و ئەگەرێ کودەنگیا کوردان نەبیت و کورد پشتەڤانیێ لێ نەکەن، ئەو کەس یێ سەرکەفتی نابیت، لەروا ھەکە کورد پشتەڤان و ھاریکارێن سەرۆک کۆماری نەبن د کارێن خوە دا یێ سەرکەفتی نابیت.
ئەندامێ جڤاتا برێڤەبرنا حزبا ھەڤپەیمانیێ ئاماژەدا وێ ئێکێ ژی و گۆت: ئەم دخوازین ئێکرێزیا ناڤمالیا کوردان بھێتە پاراستن، ناڤمالیا کوردان بھێتە رێکخستن و ئەو مافێن دستووری یێن کوردان ل بەغدا ھەین، جارەکا دیتر ب دەستڤەبینین، ھەکە ئێکرێزیا خوە تەمام نەکەین وی دەمی ھەموو کوردستان دێ زەرەرمەند بیت و عەرەب دێ مفای ژێ وەرگرن.
عوسمان گۆلپێ ھەروەسا دووپاتکر، پشتی بەرھەم سالح حزبا ھەڤپەیمانی دێ یا بەردەوام بیت و ل سەر کەسەکێ ناراوەستیت، و حزبا ناڤبری پاشگۆیێ چو حزبان ژی نابیت، ودێ یا بەردەوام بیت ل سەر کار و بەرنامە و پرۆژێن بۆ ھاتینە دانان.
سەبارەت ھەردو ئەندامێن حزبا ھەڤپەیمانیێ ل پەرلەمانێ بەغدا ژی ناڤبری گۆت: ئەو ھەردو ئەندامێن مە رەنگ و سەنگا حزبا ھەڤپەیمانیێ نە، و ھەتا نوکە وەک فڕاگسیۆنا ھەڤپەیمانیێ ئەم سەرەدەریێ ل گەل دکەین، بەلێ ھەکە ھات و چوونە دناڤا ئێکەتیێ دا وێ دەمی دێ مە ژی گۆتنەکا دیتر بۆ ھەبیت.
