كرێیا هاتنوچوونێ ب ره‌فان ل دهۆكێ گرانبوو
ئه‌ڤرۆ نیۆز، رێوار مزیری:
پشتی ل رۆژێن بۆری بهایێ لترا پانزینێ ل هه‌رێما كوردستانێ گرانبووی كرێیا ترۆمبێلین ره‌ف ژی یێن كو هاتنوچوونێ ل هێلێن ناڤخۆ یێن باژێرێ دهۆكێ دكه‌ن گرانبوویه، ژ 500 دیناران بوویه 750 دینار، سه‌رۆكێ لیژنا قانوونی و هێزێن ناڤخۆ ژی ل جڤاتا پارێزگه‌ها دهۆكێ ئاشكرا كر كو مافێ شۆفێرانه بهایێ كرێ یا هاتنوچوونێ ل سه‌ر وه‌لاتیان گران كه‌ن، چونكی بهایێ لترا پانزینێ یێ گرانبووی و بۆ وان ده‌ست ناده‌ت ب بهایێ به‌ری نوكه وه‌لاتیان ڤه‌گوهێزن.
ئدریس هه‌ركی، سه‌رۆكێ لیژنا قانوونی و هێزێن ناڤخۆ ل جڤاتا پارێزگه‌ها دهۆكێ بۆ ئه‌ڤرۆ نیۆز دیار كر كو هه‌ر ده‌مێ بهایێ لترا پانزینێ ئه‌رزان بۆ دڤێت سه‌ندیكا ڤه‌گوهاستنێ ل دهۆكێ بهایێ كریا هاتنوچوونا وه‌لاتیا ب ترۆمبێلێن كرێ كێم بكه‌ت و گۆت: “دڤێت چاره‌سه‌ریه‌ك بۆ ڤێ چه‌ندێ بهێته دیتن هه‌ر چو نه‌بیت حه‌فتیانه چه‌ند لتره‌كێن پانزینێ بۆ شۆفێرێن ترۆمبێلێن كرێ هه‌ین بهێنه دابینكرن داكو بۆ وان ده‌ست بده‌ت ب بهایێ به‌ری نوكه وه‌لاتیان ڤه‌گۆهێزن”.
ناڤهاتی ئاماژه دا وێ چه‌ندێ كو ب شێوه‌كێ گشتی داكو زیان نه‌گه‌هیته شۆفێران و وان وه‌لاتیان ژی یێن كو ب ترۆمبێلێن كرێ هاتنوچوونێ دكه‌ن، پێدڤیه پیڤه‌رێ هژمارتنا كیلۆمه‌تران د ناڤ ترۆمبێلێن كرێ دا بهێته دانان ب تایبه‌ت ترۆمبێلین ته‌كسی و یێن نڤیسینگه‌هان و گۆت: “ئه‌م وه‌كو لیژنێن په‌یوه‌ندیدار ل جڤاتا پارێزگه‌ها دهۆكێ دێ بزاڤێ كه‌ین وه‌كو پرۆژه‌ك دووڤچوونا ڤێ چه‌ندێ بكه‌ین و بڕیاره‌كێ بده‌ین كو د ڤێ قووناغێ دا پیڤه‌رێ هژمارتنا كیلۆمه‌تران د ناڤ ترۆمبێلێن كرێ دا بهێته دانان و كه‌سێن بسپۆر بهایێ هاتنوچوونێ ل دووڤ وی پیڤه‌ری دیار بكه‌ن”.
