48 پرۆژێن گەشتیاری دێ ل زاخۆ ھێنە چێکرن
ئەڤرۆ نيوز:
رێڤەبەرێ گشتی یێ گەشتوگۆزارێ ل پارێزگەھا دھۆکێ بۆ رۆژناما ئەڤرۆ دیار کر ژ سەرجەمێ 204 پرۆژێن د ماستەر پلانا گەشتیاری دا یێن کو دێ ل پارێزگەھا دھۆکێ ھێنە چێکرن، 48 پرۆژە ژ ماستەر پلانا گەشتیاری یێن سنوورێ قەزا زاخۆ نە و گۆت: “کار د چێکرنا ھندەک ژ وان پرۆژان دا ھاتیەکرن، ھەروەسا رێژا ھاتنا گەشتیاران ژی بۆ قەزا زاخۆ بەراورد ل گەل سالا بۆری 30% زێدەبوویە”.
عوبەیدوللا داود، رێڤەبەرێ گشتی یێ گەشتوگۆزارێ ل پارێزگەھا دھۆکێ ئاشکرا کر کو 204 پرۆژێن گەشتیاری د ماستەر پلانا پارێزگەھا دھۆکێ دا ھەنە کو 48 ژ وان دکەڤنە سنوورێ قەزا زاخۆ و ھەتا نوکە کار د چێکرنا ھندەک ژ وان پرۆژان دا ھاتیەکرن، لێ ژ بەر قەیرانا دارایی یا ب سەر ھەرێمێ دا ھاتی کار د چێکرنا پرۆژێن مای دا ھاتیە راوەستاندن و گۆت: “نوکە مە چەندین پێنگاڤ ھاڤێتینە بۆ وێ چەندێ رەخێن خابیرێ د ناڤ زاخۆ ڕا دچیت بکەینە پارکێن جوان، سەرەرایی ڤێ چەندێ مە پارکەک بەرامبەر تاخێ جوھیان ل زاخۆ چێدکر، لێ ژ بەر قەیرانا دارایی کار تێدا ھاتبوو راوەستاندن، بەلێ نوکە باژێرڤانی یا وێ پارکێ ژی تەمام دکەت، ھەروەسا د پلانا مەدایە حەفت سکرێن بن ئاڤ د ناڤ خابیری دا ژ پرا دەلال ھەتا دووماھیا باژێری و تلفریکەکێ ژی ژ پرا ناڤھاتی ھەتا پارکا ئامەد چێکەین و ئەڤ پرۆژە دێ جوانیەکا دی دەنە باژێرێ زاخۆ”.
ناڤھاتی ئاماژە دا وێ چەندێ کو کەرتێ تایبەت ھەتا نوکە وەکو پێدڤی نەھاتیە پێش کو بھێت پرۆژێن گەشیاری چێکەت، چونکی پارەکێ مەزن ل پرۆژێن گەشتیاری دھێتە مەزاختن و داھاتێ پرۆژەی زوو بۆ ناھێتە ڤەگەڕاندن، ژ بەر ڤێ چەندێ پێدڤیە ھندەک گوھۆڕین یان راستڤەکرن د قانوونا وەبەرئینانێ دا بھێنەکرن بۆ وێ چەندێ کو کەرتێ گشتی زێدەتر ھاریکاریا کەرتێ تایبەت بکەت بۆ چێکرنا پرۆژێن گەشتیاری، چونکی کەرتێ تایبەت دینەمویێ پێشڤەچوونا گەشتوگۆزارێ یە و گۆت: ”ھەکە ئاسانکاری د بابەتێن دانا باجێ و رسۆماتان و دابینکرنا ئەردی و مولکداریکرنێ دا بۆ وەبەرئینەران بھێنەکرن، ئەڤ چەندە دبیتە پالدەرەک کو وەبەرئینەر پتر پرۆژێن گەشتیاری چێکەن”.