پشتى 9 خه‌لاتێن جيهانى Deminer ئه‌ڤرۆ دێ هێته نيشاندان
ئەڤرۆنیۆز، سالار دۆسکی
ژڤانە ئەڤرۆ 22-10-2018 ئێڤاری ل ھولا کونگران فلمێ (The Deminer) ژ قەھارەمانیا (فاخر) بۆ جارا ئێکێ ل باژێرێ دھۆکێ دھێتە نیشادان.
ھوگر ھروری، دەرھێنەرێ فلمێ (The Deminer) بۆ ئەڤرۆنیۆز گۆت: فلم ل سەر ژیانا قەھرەمانەکێ پێشمەرگە ب ناڤێ (عه‌قيد فاخر به‌روارى) کو ژیانا وی ڤەدگوھێزیت ژ 2003 دەمێ ھێزێن ئەمریکی ھاتینە دعیراقێ دا کو ھاریکاریا ھێزێن ئەمریکی کریە بۆ راکرنا مینان ھەتا ئەڤان سالێن دووماھیێ بەری شەھید بیت کو ھاریکاریا پێشمەرگەی کریە، ھزر و بیرێن وی بۆ قورتالکرنا مرۆڤان ژ مینان ژ ھەر تشتەکی مەزنترە بوو وبێ جوداھی یا نەتەوەیی و ئاینی و ئەڤە تشتەکێ گەلەک مەزنە و ئەوی خزمەتا مرۆڤاتیێ دکر ل باژێرێ مووسل کو باژێرەکێ عەرەبی یە و ژیانا خەلکی قورتالدکر و چەندین جاران بریندار دبیت و ھەتا پێ خوە ژی دەست دەت و نشتەگەری بۆ دھێنەکرن و کاودانێن ژیانا وی تێک دچن، ھەتا شەرێ داعش جارەکا دی ڤەدگەریتە دناف پیشمەرگەی دا و ئەو بخوە دبێژیت خوشترین رۆژێن ژیانا من ل گەل پێشمەرگەی و قورتالکرنا وان ژ مینان.
ھوگر ھروری ئەو ژی گۆت: گەلەک ژ ئەرشیفێ کاک (فاخر) مە بدەست خوە ڤە ئێخستی یە ژسالا 2003 ھەتا ڤێ دووماھیێ و فلم مالا وی دیتی یە، دەرھێنەرێ فلمی ئاماژە دکەتە وێ چەندێ کو شەھید بوونا وی گەلەک کارتێکرن ل خەلکێ کوردستانێ کرو فلمی ژی ھاتیەکرن و ھەکە یێ ساخ با دا گەلەک سحبەتێن دی ژی ھێنەکرن دفلمی دا.
دەرھێنەرێ فلمی ئاماژە کرە دەمێ فلمی کو (83) خولەکن، سێ وێنەگران وێنەکریە (شینوار کەمال، فیراس باکرمانی، ئێرس) مۆزیکا فلمی ھونەرمەند(محەمەد زەکی) دروست کریە، بەرھەم ھێنەرێ فلمی کەسەکێ یتالی یە ب ناڤێ (ئەنتونیو) گەلەک ژ خێزان و ھەڤال و دوستێن (فاخر) ل گەل وی دپشکدارن ل فلمی دا لێ قەھرەمانێ فلمی شەھید(فاخر)ە.
گۆت: بۆ جارا ئێکێ ئەڤرۆ دێ ل باژێرێ(فاخر) فلم ھێتە نیشادان و بخێرا وی گەلەک باژێرێن جیھانێ ئەڤرۆ دێ ناڤێ دھۆکێ گوھلێ بن، فلمێ ناڤبری چوویە گەلەک فیستەڤالێن جیھانی و ھەتا نوکە (9) خەلاتێن مەزن بدەست خوە ڤە ئێخستینە و ژڤانە ل داھاتی ژی ل گەل فیستەڤالێن مەزنێن جیھانێ بھێتە نیشادان.
ھروری ئەو ژی دیارکر کو ژیانا خوە ھەموویێ دا وەک ئەڤی کاری ماندیبوون تێدا نەبریە، گۆت: لێ من چاڤ ل خەلاتی نینە ل فلمە فیستەڤالا دھۆک و چ جاران چاڤەرێی خەلاتان نەبوویمە و کەیف خوشم ئەڤرۆ دێ ل باژێرێ وی ھێتە نیشادانێ و ئەڤە مەزنترین خەلاتە.