رژێما سووریا گەفا داگیرکرنا رۆژئاڤایێ کوردستانێ دکەت
ئه‌ڤرۆ نيوز:
وەزیرێ بەرگیریێ یێ رژێما سووریێ راگەھاند کو دێ ئدلب بێی شەر ڤەگەریتە سەر ب حوکمەتا ناڤەندی و ئەو دەڤەرێن نھا ل ژێر کۆنترۆلا ھێزێن کوردی ژی ھەکە رادەستی مە نەکەن دێ لەشکرێ مە ھێرشی وان دەڤەران کەن و چاڤدێرێن سیاسی یێن کورد ژی دبێژن دڤێت کورد ل ھەمبەر ھێرشێن رژێما سووریێ ئێکەتیا خوە دروست بکەن.
وەزیرێ بەرگیریێ یێ سووریێ عەلی عەبدوللا ئەیوب بۆ دەزگەھێن راگەھاندنێ دیار کر کو ئدلب دێ بێی شەر ڤەگەریتە سەر ب حوکمەتا ناڤەندی و ئەم پێنگاڤ پێنگاڤ ھەموو ئاخا سووریێ جارەکا دی کۆنترۆل دکەین، مە دخواست ھێرشی ئدلبێ ژی بکەین لێ روسیا و ھندەک وەلاتێن دی بریار داینە کو ئاریشە بێی شەر بھێتە چارەکرن و گۆت: (ئدلب دێ بێی شەر ڤەگەریتە سەر ب حوکمەتا ناڤەندی و وی دەمی تنێ ئەو دڤەرێن ل بن کۆنترۆلا ھێزێن کوردی دمینن و دڤێت ئەو ژی وان دەڤەران رادەست بکەن، دو رێ ل پێشیا وان ھەنە یان دێ ب دانوستاندنان رادەست بکەن یان ژی ئەم دێ ھێرش کەین و ژ دەستێ وان دەرخینین).
ل دۆر ڤی بابەتی خەلیل قامشلۆ چاڤدێرێ سیاسی یێ رۆژئاڤایێ کوردستانێ بۆ رۆژناما ئەڤرۆ راگەھاند کو دیارە رێککەفتنەکا نھێنی د ناڤبەرا ئیرانێ، تورکیا و حوکمەتا سووریێ دا ھەیە، دیرۆکێ سەلماندیە کو ھەر چەندە دوژمنێن مە د ناڤا خوە دا ناکۆک ژی بن لێ دەمێ بابەت دبیتە مافێن گەلێ مە ھەموو ل ھەمبەر کوردان دبنە ئێک و گۆت: (تورکیا رازیە ھەموو تشتەکێ بۆ حوکمەتا سووریێ بکەت، بەری نھا ئەردۆگانی دگۆت دڤێت بەشار بھێتە دادگەھکرن و بگەھیتە سزایێ خوە، لێ نھا تورکیا ب رێیا ئیرانێ پشتەڤانیێ ل حوکمەتا سووریێ دکەت دا کۆنترۆلا خوە ل سەر ھەموو ئاخا سووریێ بکەت دا نەھێلن کورد ل سووریێ بگەھنە مافێن خوە، یا بەری نھا ل دژی ھەرێما کوردستانێ ھاتیە کرن نھا دخوازن ل رۆژئاڤا ژی دوبارە بکەن و مخابن ھەتا نھا ژی شیاینە گەلەک تشتان بکەن).
ناڤھاتی ئەو یەک ژی دیار کر کو ھەر رۆژ ئەم دبێژین دڤێت ھێزێن کوردی ئێکەتیا خوە دروست بکەن، ھەتا کورد نەبنە ئێک دێ دوژمن مە ژناڤ بەن، لێ مخابن ل رۆژئاڤایێ کوردستانێ ژی کورد د ناڤا خوە دا پارچە پارچە نە و ئەز ب باوەرم ھەکە حوکمەتا سووریێ ھێرشی رۆژئاڤا ژی بکەت دیسان کورد ھەموو پێکڤە د سەنگەرەکێ دا ل دژی دوژمنێ خوە شەری ناکەن و گۆت: (راستە ئەمریکا ل بەر بەرژەوەندیێن خوە نھا ل رۆژئاڤایێ کوردستانێ یە، لێ ھەکە کورد تشتەکێ بۆ خوە نەکەن ما دێ ئەمریکا شێت بۆ وان چ کەت).
لوقمان عەفرینی نڤیسەرێ رۆژئاڤایێ کوردستانێ ژی راگەھاند کو پیلانێن دوژمنان ل دژی گەلێ مە تەمام نەبووینە، وان نەڤێت ھەرێمەکا دی یا کوردی وەکو ھەرێما کوردستانێ ل سووریێ ژی ھەبیت، ژ بەر ھندێ ھەموو تشتەکێ ل دژی کوردان دکەن، مخابن کورد بخوە ژی نھا دژبەریا ھەڤدو دکەن و ژ بەر ھندێ ژی پێگەھێ کوردان لاوازە و گۆت: (ھەکە ل رۆژئاڤایێ کوردستانێ ھەر دو جڤاتێن کوردی ئێکەتیا خوە دروست کربا و پێکڤە کار کربان ئەز باوەرم نھا رۆژئاڤایێ کوردستانێ خوەدان لەشکرەکێ بھێز بوو و حوکمەتا لاواز یا سووریێ ژی نەدشیا گەفان ل کوردان بکەت، ھەر چاوا بیت ئەز ھێڤیدارم ھێزێن کوردی ڤێ راستیێ باش بزانن ھەکە ھێرشەک ل سەر رۆژئاڤا ھەبیت و وەکو عەفرینێ بکەڤیتە دەستێ دوژمنان دێ مەترسیا خوە بۆ ھەموو کوردان ھەبیت، ڤێجا ھێڤیدارم ئێدی ھەر دو جڤاتێن کوردی ژی بۆ بەرژەوەندیێن نەتەوی ببنە ئێک).