دەزگایێ خانی بەدەل رەڤۆ خەلاتکر
ئەڤرۆ نيوز، نیوار محەمەد سەلیم:
ئەڤرۆ رۆژا چارشەمبی دەزگەھێ خانی یێ رەوشەنبیری و راگەھاندنێ ل ئاڤاھیێ خوە نڤیسەر و رەوشەنبیر و رۆژنامەڤان بەدەل رەڤۆ خەلاتکر و رێورەسمێن پرتووکا وی یا نوو ژی ب ناڤێ “العالم بعیون کوردیە” کو ژ لایێ دەزگایێ ناڤبری ڤە ھاتبوو چاکرن ھاتنە گێران.
ل دەسپێکا رێورەسمان، سەرۆکێ دەزگەھێ خانی یێ رەوشەنبیری و ھۆنەری د پەیڤەکێ دا ئاماژە ب وێ چەندێ کر کو دەزگەھێ خانی چالاکیێن ژ ڤی رەنگی ب ئەرکێ خوە دزانیت، بەلێ ژ بەر قەیرانا دارایی و ئەو رەوشا ئەمنی یا ب سەر ھەرێما کوردستانێ دا ھاتی، وەکو پێدڤی نەشیایە ب ڤی کاری رابیت.
مەحفوز مایی، دا زانین ژی کو ئەو وەکو دەزگەھێ خانی دێ بزاڤێ کەن ل گەل ئێکەتیا نڤیسکاران و دەزگەھێن رەوشەنبیری و ھۆنەری ھندەک کارێن رەوشەنبیری ئەنجام بدەن.
سەرۆکێ دەزگەھێ خانی بەدەل رەڤۆ ب “تەیرێ بازێ” وەسف کر کو ھەر ژ ھندێ ھەتا مەکیسک چوویە ژبۆ دانەنیاسینا کلتۆر و ئەدەبیاتێ کوردی.
ل دووماھیێ ژی مەحفوز مایی، گۆت: “بەدەل رەڤۆ یێ مەیە، بەلێ خەلک ژ مە باشتر دبینیت”.
پشتی پەیڤا سەرۆکێ دەزگەھێ خانی ژی، فلمەکێ دێکیۆمێتی ل سەر بەدەل رەڤۆیی ھاتە نیشاندان. تێدا بەدەل رەڤۆیی بەحس ل وێ چەندێ کر کو 37 سالە خزمەتا وەرگێرانێ دکەت و بەرھەمێن نڤیسکارێن کورد بۆ زمانێن بیانی وەردگێریت.
دا زانین ژی کو ھندەک خەلات بۆ وی گەلک دگرنگن و چو جاران ژی ژبیر ناکەت وەکو خەلاتکرنا وی و رێزلێنانا وی ژ لایێ خەلکێ دھۆکێ ڤە ل سالا 2010ێ و خەلاتکرنا وی ل نەمسا ل سالا 2013ێ و خەلاتکرنا وی ل مەغرب کو مافێ ھاولاتبوونێ دابوویێ و ل زانکۆیا کازاخستنا و خەلاتێ لقا ئێک و گەلەک خەلاتێن دی.
پاشان ژی بەدەل رەڤۆیێ نڤیسکار و رەوشەنبیر و میدیا کار پەیڤەک پێشکێش کر و تێدا ئاشکەرا کر کو مللەت ب رێیا کولیژێن خوە دشێن لەشکر، نوشدار ئەندازیار چێکەن، بەلێ چو جارەکێ نەشێن نڤیسکار و تۆرەڤانەکی دروست بکەن.
