ئاستێ هنارتنا په‌ترۆلا هه‌رێمێ بۆ 400 هزار به‌رميلان زێده بوو
ئه‌ڤرۆ نيوز:
حوكمه‌تا هه‌رێما كوردستانێ زێده‌بوونا ئاستێ به‌رهه‌مئينانا په‌ترۆلێ ژ ده‌ستووريا تاوكێ كو دو زه‌ڤيێن تاوكێ و پێشابيرێ ب خوه ڤه دگريت راگه‌هاند.
د راگه‌هاندنه‌كێ دا، حوكمه‌تا هه‌رێما كوردستانێ خۆشحاليا خوه راگه‌هاند ده‌رباره‌يى ب بزاڤا كۆمپانيا كاركه‌ر ل مۆله‌تا تاوكێ كو بوويه ئه‌گه‌رێ بلندبوونا ئاستێ به‌رهه‌مئينانا په‌ترۆلێ ل زه‌ڤيا پێشابۆرێ كو رۆژانه زێده‌ترى 50 هزار به‌رميلێن په‌ترۆلێ د ماوێ 18 هه‌يڤان دا.
د راگه‌هاندنا حوكمه‌تا هه‌رێما كوردستانێ دا هاتيه كو زێده‌بوونا به‌رهه‌مئينانا په‌ترۆلێ ل زه‌ڤيا پێشابيرێ شيايه قه‌ره‌بوويا كێمبوونا ئاستێ به‌رهه‌مئينانا په‌ترۆلا تاوكێ بكه‌ت.
ئاستێ به‌رهه‌مئينانا په‌ترۆلێ ل زه‌ڤيا تاوكێ ل هه‌يڤا حه‌فت يا سالا 2017ێ دا، رۆژانه 109 هزار به‌رميل بووينه، به‌لێ نوكه هاتيه خوار بۆ رۆژانه 80 هزار به‌رميلان. ئاستێ به‌رهه‌مئينانا په‌ترۆلێ نوكه ل هه‌ردو زه‌ڤيێن تاوكێ و پێشابيرێ رۆژانه 126 هزار به‌رميله.
حوكمه‌تا هه‌رێما كوردستانێ دايه زانين ژى كو ويستگه‌هه‌كێ هنارتنا په‌ترۆلێ ل شێخان هاتيه دامه‌زراندن كو شيانێن ڤه‌گوهاستنا بۆريێن په‌ترۆلێ رۆژانه بلند دكه‌ت بۆ 900 هزار به‌رميلان. حوكمه‌تا هه‌رێما كوردستانێ راگه‌هانديه كو نوكه رۆژانه 400 هزار به‌رميلێت په‌ترۆلێ دهێنه ره‌وانه‌كرن.