کێ ئاگەھـ ژ قوربانیێن بوردۆمانێن تورکی ھەیە ؟
ئەڤرۆ نیوز، نەوزاد ھلۆری:
کەس و کارێن قوربانیان و زیانڤێکەفتیێن بوردومان و توپخانەیێن تورکی ل سەر دەڤەرا ئامێدیێ گازندا وێ یەکێ دکەن کو ئەڤە پتری ٢٠ سالایە کەس و کارێن وان دھێنە شتھیدکرن و گوندێن وان دھێنە بوردومانکرن و تێکدان و زیانێن زورێن ماددی ب وان دکەڤن، لێ ھەتا نوکە کەس ژ وان نەھاتینە قەرەبوکرن.
مینا موستەفا، خوشکا ئێک ژ وان شەھیدێن دەڤەرا نێروە و رێکانە کو پارسال ژلایێ فروکێن تورکیا ھاتبویە شەھیدکرن بۆ ئەڤرۆ نیوز گۆت: برایێ من و ھەمو خەلکێ دن ژی ب مەرەما دەستخوڤ ئینانا کەرستەیێن چیایی و گرتنا ماسیان وچاندن و سەخبێرکرنا رەز و بیستانێن خوە قەستا سەر ئاخ و گوندێن خوە کریە چ زولم و ستەم ژ کەسێ نەکرینە، لێ ژلایێ تورکیا ھاتنە شەھیدکرن، ھەتا نوکە ژی کەسێ چو قەرەبو نەداینە مە، ئەم داخوازا قەرەبویا بوردومانێ ژ تورکیا و جھێن شولەژێ دکەین.
ل دۆر ڤێ چەندێ عسمەت عەبدولڵا، ئەو ژی کەس و کارێ ئێک ژ قوربانیێن فروکێن تورکیایە بۆ ئەڤرۆ نیوز گۆت: داھاتێ سەرەکیێ خەلکێ مە ژ گوندێن دەڤەرێ یە، ژبەر ڤێ ب نەچاری خەلک قەستا گوندێن خوە دکەت، لێ ھەبوونا فروکا و شەرێ وان ل گەل پەکەکێ مەترسیەکا مەزن و ئێکسەر بۆ سەر گیانێ خەلکێ دەڤەرێ دروستکریە، ئەڤە زێدەتری ٢٠ سالە گوندێن مە دھێنە بوردومانکرن و خەلکێ مە دبیتە قوربانی و چوو کەس ژی نابێژیت ئەڤە قەرەبویەک تشتەک بو ھەوە، پرانیا وان کەسێن ھاتینە شەھیدکرن، خودان خێزانن و زاروکێن وان ماینە بێ سەرپەرشت و ژلایێ خەلکی و کەس و کارێن وانڤە دھێنە بخودانکرن.
ھەر ل دۆر ڤی بابەتی ئیدریس ھەرکی، ئەندامەکێ لژنا نافخوە و ئەمنی ل جڤاتا پارێزگەھا دھۆک و ئەڤرۆ نیوز گۆت: بوردومانێن تورکیا زیانێن زۆر ب پرانیا دەڤەرێن پارێزگەھا دھۆک کریە، راگرتناوان ژی کارەک ب زەحمەتە، وەک جڤاتا پارێزگەھێ مە چەندین جاران ژ نێزیک سەرەدانا جھێن بویەر و مالێن خەلکێ زیاندار و خودان قوربانی کریە، راپورت و داتایێن پێدڤی ل بارا قەرەبوکرنا خەلکی داینە جھێن شولەژێ. بەلێ ھەتا نوکە چو کەس نەھاتیە قەرەبوکرن.
دھێتە زانین کو ئەڤ سالە فرۆکێن تورکیا ١٠٨ جاران بوردومان و توپخانەیان ژی ٨٩ جاران توپبارانکرنا دەڤەرا ئامێدیێ کریە، د ئەنجامدا نێزیکێ ٢٠ شەھید و بریناران ژ خەلکێ دەڤەرێ داینە.
