یانێن دھوکێ دێ بزاڤێ کەن سەرێ لیستا خولێ ب پارێزن
ئەڤرۆ:
یاریێن گەرا دەھێ خولا ھەرێما کوردستانێ یا تەپا پێ بو یانێن پلا نایاب بریارە سوبەھی و روژا ئەینی بھێنە کرن کو نوونەرێن پارێزگەھێ زێرەڤانی و زاخۆ دێ ل یاریگەھێن خوە یاریێ کەن و دھوک دێ چیتە سلێمانیێ.
سوبەھی ل یاریگەھا خوە یانا زێرەڤانی سەرکێشا سەرێ لیستا خولێ ب نوزدە خالان، پشتی د نەە یاریێن خوە یێن ڤی وەرزشی دا توشی خوسارەتیێ نەبووی و دووماھی یاریا خوە دا سەرکەفتن ل سەر شێروانە تومارکری بریارە یاریا خوە ل د گەل یانا ھەولێر خودانا رێزا نەھێ بکەت ل یاریگەھا خوە د بزاڤەکێ دا بو بەردەوامی دا ب ئەنجامێن خو یێن سەرکەفتی و بەردەوامی دا ب دروستکرنا جوداھیێ ل گەل جیرانا خوە یانا دھوک خودانا رێزا دویێ ب شازدە خالان، ئەوا بریارە ھەر ئەڤرۆ ل سلێمانیێ یاریا خوە د گەل یانا پێشمەرگا سلێمانیێ بکەت.
یانا دھوک ژی ب ھەمان شێوە دێ شیانێن وێ د تەرخانکری بن بو قەرەبویا ژ دەست دانا دو خالێن یاریا بوری و دیسان بەردەوامیێ ب دنە پارستنا رێزا دویێ و مفای ژ بارودوخێ لاوازێ یانا ھەڤرک بینت ئەوا ل رێزا بەری دووماھیا لیستا خولێ دھێت.
ل روژا ئەینی تیما تەپا پێ یا یانا زاخۆ خودانا رێزا سیێ ب شازدە خالان یا داخوازکریە بو تومارکرنا سەرکەفتن و ب کێماسی پارستنا جھێ خوە د دەمەکی دا کو یاری ل ناڤا یاریگەھا وێ دێ ھێتە کرن و مێڤان و ھەڤرکا وێ د بارودوخەکێ نەباش دایە کو ل رێزا دوازدێ دھێت بەری یانێن پێشمەرگا سلێمانیێ و بروسک.
