لایەنێن سیاسیێن کوردی دژی بڕیارا لادانا سەرۆکێ جڤاتا پارێزگەھا کەرکووکێ نە
ئەڤرۆ نیوز، قائید میرۆ:
زۆربەیا لایەنێن سیاسیێن کوردی ل کەرکووکێ دژی لادانا سەرۆکێ جڤاتا پارێزگەھێ نە و بەرپرسەکێ پارتی ژی دبێژیت، د کۆمبوونا رۆژا ئێک شەمبی دا ھەموو لایەنێن بەرھەڤبووی پشتەڤانیا خوە بۆ رێبوار تالەبانی دیارکریە.
دکتۆر محەمەد خورشید، بەرپرسێ لقا ٣ێ یا پارتی ل کەرکوکێ بۆ ئەڤرۆ نیوز دیار کر کو لایەنێن سیاسیێن کەرکوکێ د کۆمبوونا بۆری دا ھەڤڕابوون لسەر ڤێ چەندێ دڤێت ھەموو لایەنێن کوردی ل کەرکووکێ ئێک ھەلویستبن و کار بۆ ئاسایی کرنا رەوشا کەرکووکێ بکەن، ھەروەسا ھەموو لایەنێن سیاسی یێن کوردی پشتەڤانیا خۆ بۆ رێبوار تالەبانی سەرۆکێ جڤاتا پارێزگەھا کەرکووکێ نیشادا لدۆر بزاڤێن ل سەر وی دهێنەکرن بۆ لادانێ ژ پۆستێ سەرۆکێ جڤاتا پارێزگەھێ.
بەرپرسێ پارتی ل کەرکووکێ گۆت ژی” لایەنێن کوردی دژی دەستھەلاتا نوکە یا کەرکووکێ نە و ھەر بڕیارەکا سیاسی رەتدکەن کو بکەڤیتە د چوارچوڤێ پڕۆسا داگیرکاری و پێدڤیە ئەف داگیرکاریە ب دووماھی بھێت”.
لدۆر گەھشتن ب رێکەفتنێ دگەل بەغدا بۆ ئاسایی کرنا رەوشا کەرکووکێ دکتۆر محەمەد خورشید ئاشکرا کر کو گاڤێن ئاسایی کرنا رەوشا کەرکووکێ گرێدایی سەرکردایەتیا سیاسیا ھەرێما کوردستانێ و حوکمەتا نوکە یا بەغدانە نەک لایەنێن پارێزگەھێ بشێن ئەڤێ بڕیارێ بدەن و بگەھنە رێکەفتنێ.
