زێرەڤانی و ئاکرێ تووشی خوسارەتیێ بوون
ئەڤرۆ نیوز:
فوتو، لاوک سلڤن:
ژ یاریێن گەرا یازدێ یا خولا ھەرێما کوردستانێ یا تەپا پێ بۆ یانێن نایاب ئەڤرۆ ھەردو نوونەرێن پارێزگەھێ یانێن زێرەڤانی و ئاکرێ تووشی خوسارەتیێ بوون ل سەر دەستێ یانێن نەوروز و ھەولێر.
ل یاریگەھا خوە تیما تەپا پێ یا زێرەڤانی تووشی خوسارەتیەکا نەچاڤەرێ کری بوو ل سەر دەستێ یانا نەوروز ب سێ گۆلان بەرامبەر گۆلەکێ.
د ڤێ یاریێ دا ھە ژ دەسپێکێ یاریزانێن زێرەڤانی شیان خوە نێزیکی گۆلا تیما مێڤان بکەن و مەترسیێ ل سەر گۆلا وان پەیدابکەن لێ ژ خەلەتیا بەرەڤانێ یانا زێرەڤانی دیار عەلی شیا گۆلا پێشکەفتنێ بۆ یانا خوە نەوروز بکەت ل خولەکا ٣٧ و نیڤا ئێکێ ب ڤی ئەنجامی ب دووماھی ھات.
د نیڤا دویێ دا ئاستێ یاریزانێن زێرەڤانی باشتر ھاتە دیتن و شیان کونترولا یاریێ بکەن ھەتا خولەکا ٧٧ دەمێ ژ خەلەتیا بەرەڤانێ یانا نەوروز گۆلا وەکھەڤیێ ل سەر یانا خوە تومارکری، پشتی ڤێ گۆلێ یاریزانێن زێرەڤانی ھەموو بزاڤ کرن بۆ تومارکرنا گۆلا سەرکەفتنێ و دادڤانێ یاریێ یاریزانێ یانا نەوروز ئاراس مستەفا ب کارتا سوور ژ یاریێ دوورخست لێ بەروڤاژی روودانێن یاریێ یانا نەوروز شیا مفای ژ خەلەتیێن بەرەڤانێن زێرەڤانی وەرگریت و دو گۆلان ب رێکا یاریزانێن خوە دیار عەلی و ئاسو تومار بکەن ل خولەکا ٩١ و ٩٤ و یاریێ ب سەرکەفتنا یانا خوە نەوروز ب سێ گۆلان بەرامبەر گۆلەکێ ب دووماھی بینن و ھژمارا خالێن خوە بکەنە ١٩ خال و زێرەڤانی ژی بەروەخت ما ل جھێ رێزا شەشێ ب شازدە خالان.
ژلایێ خوە ڤە نوونەرا دویێ یا پارێزگەھێ یانا ئاکرێ ژی ژ دەرڤەی یاریگەھا خوە یا بەردەوامە ل سەر ئەنجامێن خوە یێن لاواز پشتی ڤێ جارێ ژی تووشی خوسارەتیێ بووی ل سەر دەستێ یانا ھەولێر ب دو گۆلان بەرامبەر گۆلەکێ و ھەر ما ل جھێ خوە ل رێزا ١٤ و دووماھیێ ب ٥ خالان.
