ئەمریکا باش دزانیت بێ کوردان بەرژەوەندیێن وێ دڤێ دەڤەرێ دا د پاراستی نابن
ئەڤرۆ نیوز ، زنار تۆڤی:
کارۆخ خۆشناڤ شارەزایەکە د کاروبارێن ئەمریکا دا بۆ ئەڤرۆ نیوز دبێژیت: هەکە بەرژەوەندیێن ئەمریکا ل سەردەمێ هنری کیسنجەری وەزیرێ دەرڤە یێ ئەمریکا دا وەسا خواستبن کو ل سالا ۱۹۷٥ پشتا خوە بدەتە کوردان و شۆرەشا کوردی تۆشی شکەستنێ بکەت، ل رێککەفتنناما جەزائیرێ، لێ د نوکە دا ئەمریکا باش دزانیت کو د ڤێ دەڤەرێ دا بێی کوردان بەرژەوەندیێن وێ د پاراستی نابن، چونکی ئەڤ دەڤەرە دابەش بوویە ب سەر دو بەرەیان دی کو ئەو ژی شیعە و سونی نە، هەروەسا ئەمریکا چو ژ وان ب دۆستێ خوە یێ سەرەکی نزانیت، د ڤێ ناڤەندێ دا پشتی ئیسرائیلێ، کورد باشترین بژاردەیا ئەمریکا نە، هەر چەندە نوکە کورد ئەکتەرێن نێڤدەولەتینە و دناڤ خوە ژی دا د دپەرتەوازەنە، لێ یێن هاتینە تاقیکرن و دشێن پشت بەستنێ پێ بکەن، چونکی مە دیت دەمێ سەرۆک ترەمپی تویتەک بەلاڤ کری بۆ ڤەکێشانا هێزێن خوە ژ سووریێ، چو کارڤەدانەک ل دژی تویتا وی دروست بوو، هەر دناڤا ئیدارا وی هەتا گەهشتیە کۆنگرێسی و هەروەسا راگەهاندنا ئەمریکا و ناڤەندێن ڤەکۆلینێن ستراتیجی ژی. ناڤهاتی گۆت زێدەتر گۆت: ئەمریکا پشتی نیڤا دویێ ژ سەدێ بیستێ هەتا نوکە پەیوەندیێن راستەوخۆ و نە راستەوخۆ ل گەل کوردان دروستکرینە، د ڤی ماوەی دا کوردان هەلوێستێن باش و خراب ژ ئەمریکا دیتینە، هەر ژ سەردەمێ سەرۆکێن ئەمریکا ژ نیکسنی و کلنتۆنی و بۆشی و ئۆبامای، هەتاکو دگەهیتە سەردەمێ سەرۆک ترەمپی، کو دڤی ماێ درێژ دا چەند جاران ئەمریکا پشتا خوە دایە کوردان و هندەک جاران ژی پشتا کوردان گرتیە.
کارۆخ خۆشناڤی ئەو ژی دیارکر: پشتی نەرازیبوونا تورکیا، دێ باوەری ب ئەمریکا و هەلوێستێ وێ ل سەر پاراستنا کوردان کەڤیتە ژێر تاقیکرنەکا نێڤدەولەتی، ئەرێ دێ ئەمریکا هەتا دووماهیێ داکۆکیێ ل ڤی مەرجێ خوە کەت و دێ کوردان ژ هێرشەکا درندانە یا چاڤەرێکری یا رژێما ئەردوغانی پارێزیت، یان ژی دێ مەیدانێ بۆ رژێما تورکیا چۆل کەت؟، لەوما دڤی هەلومەرجیدا نابیت ئەمریکا پشتا خوە بدەتە کوردان و رێکێ بدەتە تورکیا کو کوردان جینۆساید بکەت، چونکی کوردان ژ پێش جیهانا ئازاد ڤە شەرێ داعشێ کریە، لەوما د نوکە دا ستێرا کوردان بەرەف گەشبوونێ یە، لێ ب مەرجەکێ پێدڤیە کورد چارەسەریا پەرتەوازەیا خوە بکەن. هەروەسا دیارکر ژی: پشتی وان کارڤەدانانێن بەرپرسێن ئەمریکا ترەمپی دو مەرج داناینە بۆ تورکیا، بۆ هندێ ل دەمێ ڤەکێشانا ئەمریکا ژ سووریێ جێبەجێ بکەت، کو ئەو دو مەرج ژی پێکهاتینە ژ پاراستنا کوردان و بەردەوامیدانا ئەمریکا ب شەرێ داعشێ، هەر چەندە جۆن بۆلتن شیرەتکارێ ئاسایشا نیشتیمانی یا ئەمریکا چوویە ئەنقەرە ژی، بەلێ ئەردوغان ئامادە نەبوو پێشوازیێ لێ بکەت، ئەردۆغانی ئە چەندە وەکو نەرازیبوونەکێ سەبارەت ب مەرجێن ئەمریکا بۆ پاراستنا کوردان دەربریە، لەوما ئەڤ هەلویستێ ئەردۆغانی دێ دوبارە پەیوەندیێن ئەمریکا و تورکیا بەرەف ئالۆزیان ڤە بەت.
