وه‌لاتیه‌كێ ده‌ڤه‌را بارزان د شه‌رێ توركیا و په‌كه‌كێ دا هاته شه‌هیدكرن
ئه‌ڤرۆ نیوز:
شه‌ڤا بورى ژ ئه‌نجامێ شه‌ره‌كێ دناڤبه‌را سوپایێ توركیا و گه‌ریلایێن په‌كه‌كێ ل سنوورێ ده‌ڤه‌را بارزان، ل ئێك ژ چیایێن ده‌ڤه‌رێ گه‌نجه‌ك هاته برینداركرن، ده‌مه‌كێ كێم به‌رى نوكه كه‌سوكارێن وى چوونه چیایى داكو بزڤرینن به‌لێ ژبه‌ر گرانیا برینا وى گیانێ خوه ژ ده‌ست دابوو.
عادل شێروانى، وه‌لاتیه‌كێ ده‌ڤه‌رێ یه بۆ ئه‌ڤرۆ نیوز گۆت: (دوهى ب مه‌ره‌ما كومكرنا گژوگیایێ بوهارى وه‌لاتیه‌ك ب ناڤێ لازم عه‌لى خه‌لكێ گوندێ پێندرو دچیته چیایێ بوتین ل مزورى بالا یا سه‌ر ب ده‌ڤه‌را بارزان، به‌لێ ب مخابنی ڤه هه‌ر ل وى ده‌مى شه‌ر دناڤبه‌را سوپایێ توركیا و گه‌ریلایێن په‌كه‌كێ دروست دبیت و د ئه‌نجام دا ئه‌و ژى بریندار دبیت و دمینیته چیایى هه‌تا ئه‌ڤرۆ سپێدێ).
زێده‌تر گۆت: (ئه‌ڤرۆ سپێدێ خه‌لكێ گوندى چوینه جهێ روودانێ، به‌لێ ب مخابنی ڤه ئه‌وى وه‌لاتى گیانێ خوه ژ ده‌ست دابوو، ئه‌م دخوازین كو خه‌لكێ مه بهێته پاراستن ژ شه‌ر و ئالوزیێن دناڤبه‌را توركیا و په‌كه‌كێ).