فورات شەرع بۆ ئەڤرۆ: کێشا ئابووری ل عیراقێ نامینیت
ئەندامەکێ جڤاتا بلند یا ئیسلامی ب سەرۆکاتیا عەمار حەکیم راگەھاند، نزمبوونا بھایێن پەترۆلێ ل جیھانێ کارتێکرنەکا مەزن ل عیراقێ کریە و د ئەنجامدا گرفتەکا ئابووری پەیدا کریە، لێ گەشبینیا خوە ژی دیارکر کو ئەڤ گرفتە ل عیراقێ یا درێژ نابیت.
فورات شەرع ئەندامێ بەرێ یێ لیژنا پەترۆلێ و غازێ د جڤاتا نوونەران دا ژ لیستا جڤاتا بلند یا ئیسلامی بۆ ئەڤرۆ گوت” ئەرزانبوونا بلەز و ژ نشکەکێڤە یا بھایێن پەترۆلێ ل جیھانێ، دێ شوونوارێن نەرێنی ل گەلەک وەلاتان ل دووڤ خوە ئینیت و ژوان ژی ل عیراقێ، لێ پێدڤیە ژ لایێ حوکمەتا عیراقی ڤە ب ھەڤکاری ل گەل جڤاتا نوونەران ھندەک پێرابوون بھێنە وەرگرتن بۆ وێ چەندێ ئەو کارتێکرن ل سەر عیراقێ یا مەزن نەبیت و ئەڤێ چەندێ بزاڤێن مەزن و رژد بۆ دڤێن” .
ب دیتنا فورات شەرعی، نزمبوونا بھایێن پەترۆلێ ل جیھانێ گەلەک بەردەوام نابیت، لەوما ژی ئەنجامێن ڤێ دیاردێ یێن نەرینی ل عیراقێ ھند د مەزن نابن وەکو ھندەک بووچون بۆ وێ چەندێ دچن.
ناڤبری کو جێگیربوونا بارێ سیاسی و ئێمناھیێ ل ھندەک وەلاتێن عەرەبی ب ئێک ژ ئەگەرێن سەرەکی دبینیت بۆ نزمبوونا بھایێن پەترۆلێ، دبێژیت” ئەڤ دەمە ئەوە یێ کو بلندبوون د بھایێ پەترۆلێ دا دھێتە کرن، نەکو بەر ب نزمبوونێ وەکو ئەم دبینین”.
گوت ژی”راستە نزمبوونا بھایێن پەترۆلێ کارتێکرنەکا مەزن ل ئابوورێ عیراقێ کریە و ب شێوەکێ ئێکسەر زیان یا ل سامانێ سەرەکیێ عیراقێ و بودجا عیراقێ کری و ھەتا کارتێکرنا خوە ل سەر پرۆسا سیاسی ژی یا کری، لێ ب دیتنا من ئەڤ گرفتا ئابووری ل عیراقێ یا بەردەوام نابیت و پێشبینیا وێ چەندێ دکەم کو ل دەمەکێ نێزیک گوھۆرین د بھایێن پەترۆلێ دا ل جیھانێ بھێنە کرن و بەر ب بلندبوونێ ڤە بچن”.
