د ڤێ ھەیڤێ دێ دوڤچوونا ئاریشا بەلاڤکرنا پارچێن ئەردی کەین
دھۆک، لەزگین جۆقی:
ئەندامەکێ جڤاتا پارێزگەھا دھۆکێ بۆ ئەڤرۆ دیار کرکو د ڤێ ھەیڤێ دا دێ لیژنا وان دوڤچوونا چارەسەرکرنا ئاریشا بەلاڤکرنا پارچێن ئەردی کەت کو ئەڤە چەند سالە دۆرێن ١٢ ھەتا ١٣ ھزار کەسان رازەمەندیا وەرگرتنا ئەردی یا ھەی و ھێشتا وەرنەگرتینە.
کەریم چەمانکی سەرۆکێ لیژنا باژێرڤانی و خزمەتگوزاریێن گشتی ل جڤاتا پارێزگەھا دھۆکێ دیار کر کو دێ دوڤچوونەکا رژد ل سەر چارەسەکرنا ئاریشا بەلاڤکرنا پارچێن ئەردی کەن یان دێ ھێنە بەلاڤکرن یان ژی دێ مینن دێ تشتەکێ بۆ خەلکێ خوە دیار کەن و گۆت “بەری نوکە ئەرد ھاتبوو ل دەڤەرا دومیز دەستنیشانکرن، لێ ل دووڤ پێزانینێن گەھشتینە مە ناھێتە بەلاڤکرن، چونکو ئەردێ چاندنی یە و رەنگە وەزارەتا چاندنێ رازی نەبیت”.
ئەندامێ لیژنا خزمەتگوزاری ل جڤاتا پارێزگەھا دھۆکێ دیار کر ژی کو ھەر دەمێ ئەرد ھاتە دابینکرن و کەسێن بەری نوکە رازەمەندی وەرگرتی ھەموو وەرگرن دێ لیژنە ھێنە دروستکرن بۆ وان فەرمانبەرێن خالێن وان گەھشتینە رێژا دەستنیشانکری، ئانکو پشتی وان دێ دەست ب بەلاڤکرنا ئەردی ھێتە کرن ل سەر وان فەرمانبەرێن گەلەک خال ھەین و نەمفادار”.
چەمانکی ئەو ژی خویا کر کو ل پارێزگەھا دھۆکێ ئەرد بۆ بەلاڤکرنێ ل سەر فەرمانبەران نەمایە، لێ ئەو وەکو جڤاتا پارێزگەھا دھۆکێ دێ ب رژدی کار کەن بۆ دابینکرنا ئەردی داکو کەسێن رازەمەندیا وەرگرتنا ئەردی ھەی وەربگرن”.
