وەزارەتا بازرگانی یا عیراقێ گەنمێ کەنەدی رەوانەی سایلۆیا شێخان دکەت
ئەڤرۆ نیوز، بارزان مزووری:
رێڤەبەرێ سایلۆیا شێخان بۆ ئەڤرۆ نیوز دیار کر، وەزارەتا بازرگانی یا عیراقێ دو ھزار و ٥٠٠ تەنێن گەنمێ کەنەدی ژ مینایێ رەوانەی سایلۆیا شێخان کرینە کو ل سایلۆیێ بھێتە وەرگرتن.
مازن گاڤان، رێڤەبەرێ سایلۆیا شێخان دیار کر کو ٩٠% ئەڤ سالە گەنمێ پلە ئێک ھاتیە وەرگرتن ل سایلۆیا شێخان جودا دگەل سالا بۆری، بەلێ جھێ داخێ یە حوکمەتا عیراقێ ھەر ئێک تەنا گەنمی ب ١٨٠ کیلۆیا وەردگریت و بۆ سایلۆیا بازیوە ل مووسل ھەر تەنەکێ ب ٦٠٠ کیلۆیان وەردگریت، ئەڤە ژی غەدرەکا مەزنە ل جۆتیارێن ھەرێما کوردستانێ دھێتە کرن.
ئاماژە ب وێ چەندێ ژی کر کو بەھرا سایلۆیا شێخان ٦٠ ھزار تەنێن گەنمی نە، قەزا شێخان ٢٥ ھزارتەن ئاکرێ ١٨ ھزار تەن بەردەڕەش ١٥ ھزار تەن، ل دووڤ ڤێ رێژێ دێ زیان ب جۆتیارا کەڤن ژبلی ئەو گەنمێ بیانی بۆ سایلۆیا شێخان ھاتیە رەوانەکرن.
مازن گاڤان گۆت: “ئەڤ سالە رێژا بەرھەمێ گەنمێ جۆتیاران ژ سالا بۆری باشترە، ژ بەرکو د سالا بۆری دا رێژەکا کێم یا گەنمی ب پلە ئێک ھاتبوو وەرگرتن، لێ ئەڤ سالە رێژا زێدەتر یا گەنمی ب پلە ئێک ھاتیە وەرگرتن”.