هه‌ڤپه‌يمانيا نێڤده‌وله‌تى: دێ پێگيريێ ب بريارا عه‌بدولمه‌هدى كه‌ين
ئه‌ڤرۆ نيوز:
پشتى عادل عه‌بدولمه‌هدى سه‌رۆك وه‌زيرێن عيراقێ به‌رى دو رۆژان هه‌موو مۆله‌تێن تايبه‌ت ب فرۆكێن له‌شكرى يێن بيانى ب سه‌ر ئه‌سمانێ عيراقێ دا هه‌لوه‌شاندين، هه‌ڤپه‌يمانيا نێڤده‌وله‌تى يا دژى داعشێ پێگيريا خوه ب وێ بريارێ راگه‌هاند .
هه‌ڤپه‌يمانيا نێڤده‌وله‌تى راگه‌هاند” چه‌ند فه‌رماندێن بلند يێن هه‌ڤپه‌يمانيێ ل گه‌ل به‌رپرسێن وه‌زاره‌تا به‌رگريا عيراقێ كۆمبوون وبه‌حسێ رێنمايێن سه‌رۆك وه‌زيرێن عيراقێ سه‌باره‌ت لڤينێن فرۆكێن هه‌ڤپه‌يمانان كر”.
دياركر ژى” وه‌كو مێهڤان د چارچۆڤێ سنوورێ سه‌روه‌ريا عيراقێ د پێگيرين ب هه‌موو بريار ورێنمايێن حوكمه‌تا عيراقێ”.
عادل عه‌بدولمه‌هدى بريار دابوو ب هه‌لوه‌شاندنا هه‌موو مۆله‌تێن تايبه‌ت ب فرۆكه‌ڤانيێ وفرينێ ژ ون فرۆكێن بێ فرۆكه‌ڤان، فرۆكێن كۆمكرنا پێزانينان، فرۆكێن كۆمكرنا پێزانينێن پرچه‌ككرنێ، فرۆكێن شه‌ركه‌ر و هه‌ليكوپتر وفرۆكێن دى ژى” كو نابيت ب سه‌ر ئه‌سمانێ عيراقێ دا بفرن تنێ ب مۆله‌تا تايبه‌ت يا سه‌رۆك وه‌زيرێن عيراقێ نه‌بيت.
بريارا عه‌بدولمه‌هدى پشتى سێ رۆژان دهێت ژ ته‌قينا سه‌ربازگه‌ها سه‌قر يا سه‌ر ب هێزێن حه‌شدا شه‌عبى ڤه ل ده‌ڤه‌را دوره ل باشوورێ به‌غدا كو د ئه‌نجامدا 30 كوشتى وبريندار كه‌فتن.
ته‌له‌ڤزيونا ( ئاي نيوز) ياعيراقى به‌لاڤكربوو” ئه‌و ته‌قين ژ ئه‌نجامێ هێرشه‌كا ئه‌سمانى بوو”.
