ئه‌ڤرۆ نيوز مه‌رجێن نوو يێن ئينانا ترۆمبێلێن لێداى بۆ ناڤ هه‌رێما كوردستانێ به‌لاڤ دكه‌ت
ئه‌ڤرۆ نيوز، نيوار محه‌مه‌د سه‌ليم:
وه‌زاره‌تا ناڤخۆ يا حوكمه‌تا هه‌رێما كوردستانێ راگه‌هاند كو بڕيار ب درێژكرنا وێ باوه‌رناما coc كريه هه‌تا سه‌رێ هه‌يڤا بهێت بۆ ئينانا ترۆمبێلێن بكارهاتى، هه‌روه‌سا ئه‌و ترۆمبێلێن لێداى ل هه‌يڤا ته‌باخا ئه‌ڤ ساله ژ پشكنينێ ده‌رنه‌كه‌فتين دێ هێنه ره‌وانه كرن بۆ وان وه‌لاتێن ژێ هاتين.
وه‌زاره‌تا ناڤخۆ يا حوكمه‌تا هه‌رێما كوردستانێ د دووماهى بڕيار دا كو ئيمزا رێبه‌ر ئه‌حمه‌د، وه‌زيرێ ناڤخۆ، ل سه‌ر بڕيار دايه كو ئه‌و ترۆمبێلێن ژ وێڤه‌ى ئێكى ئيلۆنا ئه‌ڤ ساله ژ ئه‌گه‌رێ نه‌بوونا باوه‌رناما coc هاتينه راگرتن بيننه ناڤ هه‌رێما كوردستانێ ب مه‌رجه‌كى ل پشكنينێ ده‌ربچن.
بڕيار پشتى كۆمبوونا لژنه‌كا هه‌ڤپشك يا وه‌زاره‌تا ناڤخۆ و دارايى ده‌رچوو كو ئاماژه ب وێ چه‌ندێ كريه كو ئه‌و ترۆمبێلێن ل پشتى ئێكى ته‌باخا ئه‌ڤ ساله هاتينه ناڤ هه‌رێمێ و ل پشكنينێ ده‌رنه‌چووين، ل خالێن سنورى هاتينه راگرتن، ل سه‌ر خودانێ كۆمپانيێ پێدڤيه ڤه‌گه‌رينيته وى جهێ ژێ هاتى.
ب گۆره‌ى رێنمايێن نوو يێن وه‌زاره‌تا ناڤخۆ “نابيت ترۆمبێلێن ب به‌ر له‌هيان كه‌فتين يان لێدانێن گران بن يان ژى محه‌وه‌ر بهێنه ناڤ هه‌رێما كوردستانێ، هه‌كه كۆمپانيا پشكنينێ كارئاسانى ژى بۆ كر و ئه‌و ترۆمبێل هاته ناڤ هه‌رێمێ و ب گۆره‌ى رێنمايێن وه‌زاره‌تێ نه‌بوون، دێ ب كۆژمێ 50 مليۆن ديناران هێنه غورامه‌كرن”.
ئه‌ڤه د ده‌مه‌كى دايه كو ل ناڤه‌راستا ئه‌ڤ ساله حوكمه‌تا هه‌رێما كوردستانێ بڕيار دايه ل ئێكى ته‌باخا ئه‌ڤ ساله هنارتنا ترۆمبێلێن لێدايى، چێكريه‌ڤه و بن ئاڤ كه‌فتين بۆ ناڤ هه‌رێما كوردستانێ بهێته قه‌ده‌غه‌كرن.