مه‌زنترین فراكسیۆنا په‌رله‌مانێ عیراقێ دبیته ئۆپۆزسیۆن و مانگرتن ژى راگه‌هاند
ئه‌ڤرۆ نیوز:
وه‌كو دهاته چاڤه‌رێكرن، پشتى دووماهى به‌یانناما موقته‌دا سه‌در سه‌رۆكێ ره‌وتێ سه‌درى و لیستا سائیرون كو ب ئاشكرا پشته‌ڤانیا خوه بۆ خوه‌نیشانده‌ران ده‌ربرى و داخوازا ده‌ست ژ كاركێشانا حوكمه‌تا عیراقى كرى، ئه‌ڤرۆ فراكسیۆنا هه‌ڤپه‌یمانیا سائیرون ل په‌رله‌مانێ عیراقێ ئۆپۆزسیۆنا خوه و مانگرتن د ناڤ په‌رله‌مانى دا دا راگه‌هاند.
ئه‌ڤرۆ فراكسیۆنا سائیرون، كو مه‌زنترين فراكسيۆنا په‌رله‌مانێ عيراقێ يه ب 54 كورسيان ژ سه‌رجه‌مێ 239كورسيان، د كۆنگره‌كێ رۆژنامه‌ڤانى دا راگه‌هاند” ژبه‌ر نه‌بوونا گاڤێن راسته‌قینه بۆ چاكسازیێ، بوویه پێدڤیه‌ك كو به‌رپرسیاره‌تیا ئه‌خلاقى و نیشتمانى بۆ پاراستنا عیراقێ وه‌ربگرین، له‌وما ل سه‌ر وى بنه‌مای، وه‌كو فراكسیۆنا هه‌ڤپه‌یمانیا سائیرون رادگه‌هینین كو دێ بینه ئۆپۆزسیۆن و دێ د ناڤ په‌رله‌مانى دا ده‌ست ب مانگرتنێ كه‌ین هه‌تا ده‌مێ به‌رسڤا داخوازیێن خوه‌نیشانده‌ران دهێته دان و پێدڤیه ژى هه‌موو هێزێن سیاسى چاڤ ل گاڤا مه بكه‌ن”.
