ئێكه‌م زه‌یتونن دناڤ بازارێن عێراقێ دا
ئه‌ڤرۆ نیوز، بارزان مزووری:
گوندێ” ده‌كان” ئێكه‌م گوند دهێن هژمارتن ل سه‌ر ئاستێ قه‌زا شێخان بۆ به‌رهه‌م ئینانا حه‌فت جورێن زه‌یتونا،زێده‌تری 5 هزار دارێن زه‌یتونێن كه‌ڤنار كۆ ل ده‌ست پێكا دروست بوونا وان گوندا هاتینه چاندن.
خه‌لیل ده‌كانی،ئێك ژ كه‌ساتیێن دانعه‌مر بۆ ئه‌ڤرۆ نیوز گۆت: (ل گوندێ ده‌كان حه‌فت جورێن زه‌یتونا یێن هه‌ین دوو ژوان جورا دهێنه ڤه‌گرتن بۆ خارنێ ئه‌و جورێن دی ژی دهێنه بكارئینان بۆ دروست كرنا زه‌یتی، زه‌یتونا ده‌كان ل سه‌ر ئاستێ هه‌موو عێراقێ یا بناڤ و ده‌نگه).
ناڤهاتی خویاكر ژیێ وان زه‌یتونا گه‌له‌ك یێ كه‌ڤناره مێژوویا وان ڤه‌دگه‌رێت بۆ ده‌ست پێكا ئاڤاكرنا وان هه‌ردوو گوندا، هه‌رچه‌نده د سه‌رده‌مێ كه‌ڤن دا گه‌له‌ك جارا هاتینه سوتن به‌لێ دوباره شین بوینه.
ئه‌یاس عومه‌ر ئێك ژ خودانێن زێده‌تری هزار دارێن زه‌یتونا بۆ ئه‌ڤرۆ نیوز گۆت:ئه‌ڤ سال به‌رهه‌مێ وان گه‌له‌ك یێ باش بۆ به‌لێ رێژا هه‌ره مه‌زن یا وان زه‌یتونا هاتن ڤه‌گرتن بۆ خارنێ بۆ فرۆتنێ.
ناڤهاتی خویاكر گه‌له‌ك جاران ل ده‌رڤه‌ی وه‌لاتی داخاز ل مه هاتیه كرن كۆ زه‌یتونێن ده‌كان بۆ فرێ بكه‌ین.
عبدالله عیرفان،ئێك ژ كریارێن زه‌یتونا گوندێ ده‌كان بۆ ئه‌ڤرۆ نیوز گۆت:سالانه سه‌ره‌دانا گوندێ ده‌كان دكه‌م رێژه‌كا مه‌زن یا وان زه‌یتونا دكرم بۆ باشورێ عێراقێ ره‌وانه دكه‌م لدوڤ داخازیا خودان دوكانا ژبه‌ركۆ زه‌یتونا ده‌كان یا بناڤ و ده‌نگه ل هه‌موو عێراقێ گه‌له‌ك خه‌لكێ باشور نزانن كو ده‌كان گونده یاش وان ڤه ناڤێ كومپانیه‌كێ یه گه‌له‌ك جاران داخاز ژمه‌كریه زانیاریا ل سه‌ر گوندێ ده‌كان بده‌ینه وان.
