ناكۆكیێن روسیا و ئه‌مریكا ل دۆر رۆژئاڤایێ كوردستانێ زێد بووینه
ئه‌ڤرۆ:
ئاژانسا سپوتینگ یا روسیا د راپۆرته‌كێ دا دیار كریه كو حه‌فتیا بۆری دو جاران هێزێن ئه‌مریكا ل باكورێ سووریێ رێ نه‌داینه هێزێن روسیا دا ده‌ربازی دێركێ و رێیا نێڤده‌وله‌تی ببن و ژ به‌ر هندێ ژی روسیا ل هنده‌ك ده‌ڤه‌ران رێیا نێڤده‌وله‌تی داخست و ل دێركێ و كۆبانێ ژی روسیا نه‌رازیبوونا خوه ل هه‌مبه‌ر هه‌لویستێ ئه‌مریكا دیار كریه، چونكو پشتی ڤه‌كێشانا هێزێن ئه‌مریكا ل گه‌له‌ك ده‌ڤه‌رێن رۆژئاڤایێ كوردستانێ هێزێن روسیا ل وان ده‌ڤه‌ران بجه بووینه و نها به‌رپرسێن روسیا دیار دكه‌ن كو ئه‌مریكا ئه‌و مافه نینه ئاسته‌نگیان بۆ هێزێن وان دروست بكه‌ت.
ل گۆر هه‌مان ئاژانسێ پشتی ئه‌مریكا جاره‌كا دی ڤه‌گه‌ریا باكورێ سووریێ و ل ده‌ڤه‌رێن په‌ترۆلێ بجه بوو ئه‌و یه‌ك ب دلێ روسیا نه‌بوویه و نها ژی روسیا ب هه‌موو ره‌نگه‌كێ دڤێت پرسێن د ناڤبه‌را كوردان و شامێ دا بهێنه چاره‌سه‌ركرن دا ئێدی پێدڤی ب مانا هێزێن ئه‌مریكا ل باكورێ سووریێ نه‌بیت، لێ ئه‌مریكا ژی پرۆژه‌كێ خوه یێ نوو بۆ رۆژهه‌لاتێ فراتێ هه‌یه و ژ به‌ر هندێ هه‌تا نها كوردان ژی نه‌شیاینه ل دۆر پاشه‌رۆژا خوه بریاره‌كا ئێكلاكه‌ر بده‌ن و ئه‌و یه‌ك ژی بوویه جهێ نه‌رازیبوونا روسیا و چه‌ندین جاران ژی گه‌ف ل رێڤه‌به‌ریا خوه‌سه‌ر یا باكورێ سووریێ كریه دا كو ل گه‌ل شامێ هه‌موو پرسێن خوه چاره‌سه‌ر بكه‌ن لێ كورد ژی دبێژن هه‌تا شام دانپێدانێ ب رێڤه‌به‌ریا خوه‌سه‌ر نه‌كه‌ت دانوستاندن چو ئه‌نجامێن خوه نابن.
