سوبەهی دێ شاندەکێ ھەرێمێ سەرەدانا بەغدا کەت
ئەڤرۆ نیۆز، قائید میرۆ
بەرپرسەکێ پارتی دیموکراتی کوردستان ئاشکراکر، سبەی رۆژا سێ شەمبی شاندەکێ ھەرێما کوردستانێ لدۆر رەوشا دەڤەرێن کوردستانی دێ سەرەدانا بەغدا کەت و دبێژیت، رەوشا دەڤەرێن کوردستانی د رەوشەکا دژواردانە.
دیاری حوسێن، ئەندامێ جڤاتا سەرکردایەتی پارتی بۆ ئەڤرۆ نیۆز دیارکر” سبەی رۆژا سێ شەمبی شاندەکێ حوکمەتا ھەرێما کوردستانێ دێ سەرەدانا باژێڕێ بەغدا بکەت، مەرەم ل ئەڤێ سەرەدانێ ژی دێ رەوشا دەڤەرێن کوردستانی یێن دەرڤەی حوکمەتا ھەرێما کوردستانێ بیت، چونکە پێدڤیە چارەسەریەک بۆ ئێکلاکرنا رەوشا وان دەڤەران بھێتە دیتن.
ئەڤی سەرکردەیێ پارتی گۆتژی” مخابن رەوشا دەڤەرێن کوردستانی گەھشتیە ئاستەکێ مەترسیدار، بتایبەتی زۆلم و زۆری ل وەلاتیێن کورد دھێتەکرن و ھەوەکا عەرەبکرنێ ھاتیە دەستپێکرن ھەر دەرکرنا وەلاتیێن کورد ھەتا دگەھیتە داگیرکرنا مال و ئەردێ وان.
دیاری حوسێن ئاشکراکر” چەکدارێن داعش ل ئەڤێ دوماھیێ لڤینێن خوە زێدەکرینە و بووینە مەترسیەک جدی لسەر دەڤەرێن کوردستانێ، لەوڕا پێدڤیە رێگری ل بھێزبوونا داعش ھەبیت.
