داخوازا ڤه‌گه‌راندنا 400 ده‌ستخه‌تێن پاشایێن ئامێدیێ ژ به‌غدا دهێته كرن
ئه‌ڤرۆ، ئه‌میر ئه‌ترووشی
رێڤه‌به‌رێ په‌رتۆكخانا گشتی یا ئامێدیێ راگه‌هاند، مه ب نڤیساره‌كا فه‌رمی داخواز ژ به‌غدا كریه هه‌ر 400 ده‌ست خه‌تێن میر و پاشایێن ئامێدیێ ئه‌وێن ل به‌غدا ماین بۆ ئامێدیێ بهێنه ڤه‌گوهاستن و گۆت: هژماره‌كا زۆر یا نڤیسه‌رێن كورد ژ بۆ مفا وه‌رگرتنێ و چێكرنا ڤه‌كۆلین و نامێن ماسته‌ر و دكتورایێ به‌رده‌وام قه‌ستا به‌غدا دكه‌ن بۆ دیتنا وان ده‌ستخه‌تان، به‌لێ به‌غدا هه‌تا نها ب چو ره‌نگان رازی نه‌بوویه وان ده‌ست خه‌تان ب ڤه‌گه‌رینیته ڤه بۆ په‌رتۆكخانا ئامێدیێ.
سه‌لمان نهێلی، رێڤه‌به‌رێ په‌رتۆكخانا گشتی یا ئامێدیێ بۆ ئه‌ڤرۆ نیوز دیار كر، نێزیكی 10 هزار ده‌ست خه‌تێن میر و زانا و سولتان و پاشایێن ئامێدیێ هه‌بوون، به‌لێ پشتی ل سالا 1919 هنده‌ك ژ په‌رتۆكخانێن ئامێدیێ هاتینه سۆتن، پتریا په‌رتۆكان هاتنه سۆتن و یێن مایی ژی كو نێزیكی 400 ده‌ست خه‌تانه، ل وی ده‌می عیراقێ ده‌ست ب سه‌ردا گرت و برن ل به‌غدا پاراستن و هه‌تا نوكه نه‌هاتینه ڤه‌گه‌راندن.
نهێلی زێده‌تر دبێژیت: مه ب رێیا په‌رتۆكخانا گشتی یا دهۆكێ و ب نڤیساره‌كا فه‌رمی داخواز ژ به‌غدا كریه وان ده‌ست خه‌تان ب ڤه‌گه‌رینیته په‌رتۆكخانا ئامێدیێ و وان ده‌ستخه‌تان ژی هه‌موو مۆر و ناڤێن میرێن ئامێدیێ ل سه‌ر هه‌نه، ب تایبه‌ت ژی ده‌ست خه‌تێن میر سۆلتان حسێنێ كۆرێ حه‌سه‌ن، پتریا ده‌ست خه‌تێن وی ماینه ڤه.
ئاماژه ب هندێ ژی دا، هژماره‌كا زۆر یا نڤیسه‌رێن كورد ژ بۆ مفا وه‌رگرتنێ و چێكرنا ڤه‌كۆلین و نامێن ماسته‌ر و دكتورایێ به‌رده‌وام قه‌ستا به‌غدا دكه‌ن بۆ دیتنا وان ده‌ستخه‌تان، به‌لێ به‌غدا هه‌تا نها ب چو ره‌نگان رازی نه‌بوویه وان ده‌ست خه‌تان ب ڤه‌گه‌رینیته ڤه بۆ په‌رتۆكخانا ئامێدیێ.
سه‌ره‌رای هندێ خواندنگه‌ها قوبه‌هان وه‌كه خواندنگه‌هه‌كا دیروكی و شارستانی ل سه‌رانسه‌ری كوردستانێ دهێته نیاسین و دناڤا وێ خواندنگه‌هێدا هه‌ر ئێك ژ زانستێن (ئایینی و ئه‌ندازیاری و دیروكی و فه‌لسه‌فی) دهاتنه خواندن، لێ ب دلگرانی ڤه پشتی خرابكرنا وێ خواندنگه‌هێ د ده‌مێ خودا، چه‌ندین په‌رتوكێن وێ هاتنه سوتن و ژناڤبرن و چه‌ندین دانه‌یێن دیتر یێن په‌رتوكێن وێ بو به‌غدا هاتنه ره‌وانه‌كرن و هه‌تا نها نه‌هاتنه ڤه‌گه‌راندن بو ئه‌وێ ده‌ڤه‌رێ“.
سه‌لمان نهێلی، رێڤه‌به‌رێ په‌رتۆكخانا گشتی یا ئامێدیێ ئه‌و یه‌ك ژی دیار كر كو پشتی شه‌رێ جیهانیێ ئێكێ هژماره‌كا زۆر یا په‌رتۆكێن میر و پاشایێن ئامێدیێ د ناڤا په‌رتۆكخانان دا هاتنه سۆتن و ئه‌ڤه ژی بوو ئه‌گه‌ر كو رێژه‌یه‌كا مه‌زن یا دیرۆكا ئامێدیێ ژناڤ بچیت و بهێته شێلان و گۆتیشی: پشتی خواندنگه‌ها قوبه‌هان هاتیه سوتن و چه‌ندین په‌رتوك هاتینه ژ ناڤبرن، پتر ژ 400 په‌رتوكێن خواندنگه‌ها قوبه‌هان بو موزه‌خانا نیشتمانی ل به‌غدا هاتینه ره‌وانه‌كرن و دهێنه پاراستن، به‌لێ پێدڤیه ئه‌و په‌رتۆكه بۆ ئامێدیێ بهێنه ڤه‌گه‌راندن و ل جهێ خوه یێ ره‌سه‌ن بهێنه دانان.
