شیرین ئه‌مین: ده‌بێت حكومه‌ت ده‌ستی ئه‌و گروپه مافیایانه ببڕێته‌وه كه قه‌یرانی غاز له‌كوردستان دروست ده‌كه‌ن
ئه‌ڤرۆ نیۆز، عه‌زیز هه‌ورامی:
ئه‌و گروپه مافیاییه‌ی چه‌ند ڕۆژێكه به هه‌ڵكوتانه سه‌ر كێڵگه‌ی كۆرمۆر و ته‌قه‌كردن له ته‌نكه‌ری غاز و ڕێگه‌نه‌دان غاز بگاته ده‌ستی هاوڵاتیان قه‌یرانی غازیان له‌كوردستان دروست كردووه، له ڕێگه‌ی گروپی چه‌كدارییه‌وه له‌سه‌ر ڕێگاكان ته‌قه له ته‌نكه‌ری غاز ده‌كه‌ن، په‌رله‌مانتارێكیش ده‌ڵێ، پێویسته له‌سه‌ر حكومه‌ت به‌هێز ڕوبه‌ڕویان ببێته‌وه.
شیرین ئه‌مین په‌رله‌مانتاری فڕاكسیۆنی گۆڕان له په‌رله‌مانی كوردستان، به ئه‌ڤرۆ نیۆزی ڕاگه‌یاند:” له چه‌ند ڕۆژی ڕابردوو ئه‌وكێشه‌ی غاز له كوردستان دروست بووه له بنه‌ڕه‌تدا شتێك نییه به‌ناوی كێشه و قه‌یرانی غاز، ئه‌وه‌ی هه‌یه قه‌یرانی غاز دروستكراوه چه‌ند گرۆپێكی مافیا له‌ناو حزب شه‌ڕی به‌رژه‌وه‌ندی خۆیان ده‌كه‌ن، ئه‌وشه‌ڕه‌ی ئێستا هه‌یه و قه‌یرانی غازی لێكه‌وتووه‌ته‌وه له كوردستان له چوارچێوه‌ی به‌رژه‌وه‌ندی به‌رپرسه‌كان ئه‌وه‌ی له ڕابردوو خه‌ڵكی خه‌میی نه‌بوبێت دابینكردنی غاز بووه.
ناوبراو زیاتر ده‌ڵێ، پێویسته حكومه‌تی هه‌رێمی كوردستان به‌رپرسانه كاربكات و ناكرێت وه‌ك ئه‌وه‌ی له به‌یان نامه‌كه‌ی حكومه‌ت هاتووه كه‌سایه‌تی و گرۆپی مافیایی هه‌بێت، ده‌سه‌ڵاتی له سه‌رووی حكومه‌ته‌وه‌بێت و كاتێك ئێمه خاوه‌نی حكومه‌تی هه‌رێمین نابێت كه‌سانێك ته‌قه له شۆفێری ئه‌وته‌نكه‌رانه بكه‌ن غاز بۆ پارێزگاكانی هه‌ولێر و دهۆك ده‌گوازنه‌وه بۆیه ده‌بێت ئه‌منییه‌تی ته‌واو بۆ شۆفێره‌كان و كێڵگه‌ی كۆرمۆر دابین بكات، ئیجرائاتی پێویست بكات و ڕێگه نه‌دات كه‌سانێك له ناو حزب ده‌سه‌ڵاتی هه‌یه یاری به ماف و خواست و كه‌رامه‌تی گه‌له‌كه‌مان بكات.
هه‌روه‌ها ئاماژه‌ی بۆ ئه‌وه‌شكرد، ئه‌ركه له‌سه‌ر حكومه‌تی هه‌رێمی كوردستان غاز بگه‌یه‌نێته پارێزگاكانی كوردستان، بۆیه هه‌نگاوێكی باش بوو به‌بڕیاری سه‌رۆكی حكومه‌ت دوو لیوای پۆلیسی نه‌وت و گاز ڕه‌وانه‌ی كێڵگه‌ی كۆرمۆر پاراستنی ئه‌وكێڵگه‌ییه له چه‌مچه‌ماڵ و دابینكردنی ئه‌منییه‌ت بۆ كارمه‌ندان و شۆفێرانی ته‌نكه‌ره‌كان، ڕێگه‌ش نه‌درێت ئه‌و چه‌واشه‌كاریه‌ش به‌رده‌وامبێت بۆ ناشرینكردنی حكوومه‌تی هه‌رێم به‌وه‌ی به‌رپرسانێكی ده‌ست ڕۆشتوو له ناوچه‌كه ده‌سه‌ڵاتیان له حكوومه‌ت زیاتره كار بۆ ناشرینكردنی حكوومه‌ت ده‌كه‌ن، بتوانێت گرفت دروست بكات ڕێگه نه‌دات غاز و نه‌وتبگاته ده‌ستی هاوڵاتیان. هه‌روه‌ها وتی، ئه‌و گروپه مافیانه شه‌ڕی به‌رژه‌وه‌ندی خۆیان ده‌كه‌ن، نایانه‌وێت ئه‌و ته‌نده‌ره‌ی بۆ كۆمپانیایه‌كی تر ده‌رچووه غاز بگوازێته‌وه بۆ شاره‌كان، به‌ئاشكراش ده‌ستی مافیایی خۆیان درێژكردووه به‌رده‌وامن له ده‌ست درێژی خۆیان به‌وه‌ی ته‌قه له ته‌نكه‌ری گواستنه‌وه‌ی غاز ده‌كه‌ن.
